ءدىني بىرلەستىك قۇرۋ ءۇشىن نەشە ادامنىڭ باستاماسى كەرەك - مينيستر جاۋاپ بەردى

ءماجىلىس دەپۋتاتتارىنا قازاقستان زاڭدارىنا قوعامدىق بىرلەستىكتەر باعىتىندا وزگەرىستەر مەن تولىقتىرۋلار ەنگىزۋدى كوزدەيتىن زاڭ جوباسىن تانىستىرعان مادەنيەت جانە اقپارات ءمينيسترى ايدا بالايەۆا ءدىني بىرلەستىك قۇرۋ ءۇشىن نەشە ادامنىڭ باستاماسى كەرەكتىگىن ايتتى، دەپ حابارلايدى Kazinform.

«قوعامدىق بىرلەستىك قۇرۋ ءۇشىن 3 ادامنىڭ باستاماسى جەتكىلىكتى بولاتىنىن ايتىپ وتىرسىز. ءسىز ۇسىنىپ وتىرعان وزگەرىستەر مەن تولىقتىرۋلاردىڭ مۇمكىندىگىن پايدالانىپ، ءدىني راديكالدى توپتار وزدەرىنىڭ قوعامدىق بىرلەستىكتەرىن قۇرۋعا كىرىسەتىنى ايدان انىق. وزدەرى قۇرۋى مۇمكىن، بىرەۋلەردىڭ اتىنان اشۋى مۇمكىن. وسىنى رەتتەۋدىڭ قانداي مۇمكىندىكتەرى بار؟»، - دەپ سۇرادى دەپۋتات ەرمۇرات باپي.

ءمينيستردىڭ سوزىنشە، ولاي ۋايىمداۋعا نەگىز جوق.

«ءدىني بىرلەستىكتەردى قۇرۋ، تىركەۋ بۇل زاڭ جوباسىنىڭ تەتىگىنە كىرمەيدى. ولاردىڭ ارنايى زاڭدارى بار - «ءدىني قىزمەت جانە ءدىني بىرلەستىكتەر تۋرالى» زاڭ. وسى زاڭدا ءدىني بىرلەستىكتەردى قۇرۋ ءۇشىن جەرگىلىكتى ورىندا 50 ادام، رەسپۋبليكا دەڭگەيىندە 5 مىڭ ادام نيەت ەتكەندە عانا تىركەلەدى. ال وسى زاڭ جوباسىنا بۇل تەتىكتەر كىرمەيدى. سوندىقتان ونداي قاۋىپ-قاتەر جوق. ۋايىمداماۋعا بولادى»، - دەدى ايدا بالايەۆا.