ءدىني باسقارما ماس كۇيىندە ۇستالعان قوستاناي يمامىن جۇمىستان شىعارىپ، ەلدەن كەشىرىم سۇرادى

استانا. KAZINFORM - قازاقستان مۇسىلماندارىنىڭ ءدىني باسقارماسى قوستاناي وبلىسى يمامىنىڭ ماس بولىپ كولىك ايداپ ۇستالعان قىلىعىنا وراي كەشىرىم سۇرادى.

ەسكە سالا كەتەيىك، بۇعان دەيىن قوستاناي وبلىسىنىڭ يمامى باحىتبەك تاجىمبەتتىڭ 23-شىلدەدە اقمولا وبلىسىنىڭ بۋراباي كەنتىندە اۆتوكولىگىن ماس كۇيىندە جۇرگىزىپ، جول ەرەجەسىن بۇزعانىن حابارلاعان بولاتىنبىز.

ونى ءتارتىپ ساقشىلارى بۋرابايداعى «رەگيون» تۇنگى كلۋبىنىڭ جانىندا «حايلاندر» كولىگىمەن كەتىپ بارا جاتقاندا قولعا تۇسىرگەن.

يمامعا حاتتاما تولتىرىلىپ، 15 تاۋلىككە قاماۋعا الىندى.

وسى وقيعاعا بايلانىستى قازاقستان مۇسىلماندارى ءدىني باسقارماسى مالىمدەمە جاسادى.

«ءدىني باسقارمانىڭ قىزمەت جۇيەسىندە زاڭ نورمالارىن جانە ءدىن قىزمەتكەرى ەتيكاسىن ورەسكەل بۇزاتىن جەكە تۇلعالاردىڭ ءدىني سالادا جۇمىس ىستەۋىنە مورالدىق تۇرعىدان قۇقىعى جوق. ق م د ب ءدىن قىزمەتكەرىنە لايىقسىز ارەكەت جاساعان باحىتبەك تاجىمبەتتى قوستاناي وبلىسىنىڭ باس يمامى قىزمەتىنەن بوساتتى. قازاقستان مۇسىلماندارى ءدىني باسقارماسى بولعان وقيعانى ۇلكەن وكىنىشپەن قابىلداپ، ەلىمىزدەگى مۇسىلمان جاماعاتىنان كەشىرىم سۇرايدى. اللا تاعالا بارشامىزدى جاماندىق پەن وكىنىشتى ىستەرگە جەتەلەيتىن ءناپسى قالاۋىنىڭ كەسىرىنەن ساقتاعاي» دەيدى ۇيىمنان.