ءداستۇرلى ساداق اتۋدان اۋستراليا مەن قازاقستان التىن جۇلدەگە تالاسادى
استانا. KAZINFORM - ەلوردادا V دۇنيەجۇزىلىك كوشپەندىلەر ويىندارىندا ءداستۇرلى ساداق اتۋدان كوماندالىق سايىستا قازاقستان كومانداسى فينالعا شىقتى.
كوماندالىق سايىسقا 16 ەلدىڭ قۇراماسى قاتىسقان. كوماندا قۇرامىندا 3 ەر، 2 ايەل سپورتشى بولادى. ءار قاتىسۋشىعا 3 وقتان 1 مۇمكىندىك جانە 5 مينۋت ۋاقىت بەرىلەدى. ءار تيگەن جەبە ءۇشىن كوماندا ەنشىسىنە 1 ۇپايدان جازىلادى.
قازاقستان توبىندا اجار تولەۋقانوۆا، ايكوركەم باتيحان، قانات قاسىمحان، مارات بەكسۇلتان، ماقسات ابدىكەرىموۆ ونەر كورسەتىپ، فينالعا جولدۆسا الدى. ەندى قازاقستاندىق ساداقشىلار فينالدا اۋستراليا كومانداسىمەن التىن جۇلدەنى ساراپقا سالادى. سونداي- اق بۇگىن جۇلدەلى ءۇشىنشى ورىنعا رەسەي جانە يسپانيا كومانداسى تالاسادى.
ەسكە سالا كەتسەك، سايىستىڭ العاشقى كۇنى جانىبەك قۇلمىرزايەۆ پۋتا نىساناسىن كوزدەۋدە التىن جۇلدە جەڭىپ العان ەدى.
سونىمەن بىرگە قازاقستاندىق مەرگەن ەربول تاپەنوۆ كۇمىس، قانات قاسىمحان ەكى قولا جانە ايكوركەم باتيحان تاعى ءبىر قولا جۇلدەنى ەل قانجىعاسىنا سالدى.
كەشە «جامبى» نىساناسى بويىنشا جانىبەك قۇلمىرزايەۆ پەن باقبەرگەن ءسالىموۆ قولا جۇلدەگە يە بولدى.
ءداستۇرلى ساداق اتۋدان بۇعان دەيىن قازاقستان قۇراماسىنىڭ باس باپكەرى دياس احمەتوۆ اتالعان جارىستىڭ قيىندىعى نەدە ەكەنىن ايتىپ بەردى.
اۆتور
ايجان سەرىكجان قىزى