ءدامحانا مەيماندارىنان تالاپ ەتىلىپ جۇرگەن 10 پايىزدىق قوسىمشا اقىعا تىيىم سالىنادى

استانا. KAZINFORM - ەلىمىزدەگى ىشكى ساۋدا ەرەجەسىنە وزگەرىس ەنگىزۋ جوسپارلانىپ وتىر. بۇل تۋرالى ساۋدا جانە ينتەگراتسيا ءمينيسترى ارمان شاققاليەۆ ايتتى.

سەناتتىڭ جالپى وتىرىسىنان كەيىنگى باسپا ءسوز ءماسليحاتىندا تىلشىلەر مينيستردەن ءدامحانالار مەن مەيرامحانالارداعى قىزمەت ءۇشىن الىناتىن ۇستەمە اقشا مەن دەپوزيتتەر بەلگىلەۋ قانشالىقتى زاڭدى ەكەنىن سۇرادى.

«ءبىز زاڭنامانى مۇقيات زەرتتەدىك. ەگەر مەيرامحانانىڭ كىرەبەرىسىندە جاريا وفەرتا بولسا، ياعني قىزمەت كورسەتۋ شارتتارىن بەلگىلەيتىن جازباشا ءماتىندى وقىپ، ارى قاراي كىرسەڭىز، وندا ءسىز وسى شارتتارمەن كەلىسكەنىڭىزدى بىلدىرەدى. اتاپ ايتقاندا، قازىر ىشكى ساۋدا ەرەجەلەرىنە وزگەرتۋلەر ازىرلەپ جاتىرمىز. بىزدىڭشە، ەگەر سىزگە قىزمەت كورسەتىلسە جانە وندا قىزمەت كورەسەتۋ قۇنى قامتىلسا، ءدامحانالار قوسىمشا اقى الماۋى ءتيىس. سوندىقتان وسى ەرەجەلەردى پىسىقتاپ جاتىرمىز»، - دەدى ا. شاققاليەۆ.

ونىڭ ايتۋىنشا، بۇل تۇرعىدا ءتيىستى تالقىلاۋ ۇيىمداستىرىلادى.

«ارينە، بيزنەس وكىلدەرىنىڭ كەيبىرى وسى وزگەرىستەرمەن كەلىسپەۋى مۇمكىن. بۇل ماسەلە مەيرامحاناعا كەلگەن قوناقتاردان كورسەتىلگەن قىزمەت ءۇشىن قوسىمشا اقى الۋعا قاتىستى. قازىر بۇل اقىنى سىزدەر چەكتەردە جازىلىپ جۇرگەنىن كورىپ جۇرسىزدەر. ەندى بۇل الىمدى زاڭسىز ەتەتىن ءتيىستى تالاپتى بەلگىلەيمىز، ياعني قىزمەت ءۇشىن 10 پايىزدىق الىم قويىلمايدى. نەگە ادامدار كورسەتىلگەن قىزمەتكە 2 مارتە تولەۋى كەرەك؟»، - دەدى مينيستر.

ونىڭ سوزىنە قاراعاندا، اتالعان تۇزەتۋلەر قازان ايىندا ەنگىزىلۋى مۇمكىن.

اۆتور

رۋسلان عابباسوۆ