ءبىزدىڭ شەشىم قاتاڭ اقشا-كرەديت شارتتارىن ۇستاپ تۇرۋدى كوزدەيدى - تيمۋر سۇلەيمەنوۆ

استانا. KAZINFORM - ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى 14,25 پايىز دەڭگەيىندە ساقتاۋ تۋرالى شەشىم قابىلدادى. بۇل تۋرالى ۇلتتىق بانك ءتوراعاسى تيمۋر سۇلەيمەنوۆ ايتتى.

«ۇلتتىق بانكتىڭ اقشا-كرەديت ساياساتى كوميتەتى بازالىق مولشەرلەمەنى 14,25 پايىز دەڭگەيىندە ساقتاۋ تۋرالى شەشىم قابىلدادى. بۇل شەشىمدى قابىلداعاندا ينفلياتسيانىڭ ديناميكاسى مەن تاۋەكەلدەر بالانسى ەسكەرىلدى. جىلدىق ينفلياتسيا شىلدە ايىندا وسكەن سوڭ تامىز، قىركۇيەك ايلارىندا باياۋ تومەندەۋىن جالعاستىردى. ينفلياتسيا ءبىزدىڭ بولجامىمىزعا ساي قالىپتاسىپ كەلەدى، الايدا 5 پايىزدىق تارگەتتەن جوعارى بولىپ تۇر. حالىقتىڭ ينفلياتسيالىق كۇتۋلەرى دە وزگەرىپ، جوعارى دەڭگەيدە قالدى»، - دەدى ول.

ونىڭ اتاپ وتۋىنشە، سىرتقى ورتادا الەمدىك ازىق-تۇلىك باعالارى وسكەنى بايقالادى. قازاقستاننىڭ نەگىزگى ساۋدا-سەرىكتەسى - رەسەيدە ينفلياتسيا قارقىنى جوعارى. جالپى ايتقاندا، الەمدە ينفلياتسيا تومەندەپ كەلەدى. وعان ورتالىق بانكتەردىڭ جوعارى ستاۆكانى ۇزاق ۋاقىت بويى ۇستاپ تۇرۋى سەبەپ.

«ىشكى ەكونوميكادا پروينفلياتسيالىق قىسىم ساقتالۋدا. وعان فيسكالدىق ىنتالاندىرۋدىڭ كۇشەيۋىنەن قالىپتاسقان تۇتىنۋشىلىق سۇرانىس، تۇرعىن ءۇي كوممۋنالدىق قىزمەتى باعالارىنىڭ ءوسۋى جانە حالىقتىڭ ينفلياتسيالىق كۇتۋلەردىڭ ارتۋى اسەر ەتىپ وتىر. ءبىزدىڭ شەشىم قاتاڭ اقشا- كرەديت شارتتارىن ۇستاپ تۇرۋ ساياساتىن جالعاستىرۋدى كوزدەيدى. ول باعا ءوسىمىن باياۋلاتىپ، ينفلياتسيا بويىنشا ماقساتقا قول جەتكىزۋ ءۇشىن قاجەت»، - دەدى تيمۋر سۇلەيمەنوۆ.