ءبىز ءبارىن باسىنان باستايمىز - ستانيسلاۆ چەرچەسوۆ

الماتى. KAZINFORM - فۋتبولدان قازاقستان قۇراماسىنىڭ باس باپكەرى ستانيسلاۆ چەرچەسوۆ نورۆەگيامەن بولاتىن ماتچ الدىندا باسپا ءسوز ءماسليحاتىن وتكىزىپ، جۋرناليستەر ساۋالىنا جاۋاپ بەردى.

رەسەيلىك مامان قازاقستان ۇلتتىق قۇراماسىنىڭ الدىندا ناقتى مىندەت بار ەكەنىن جەتكىزدى.

«ءبىزدىڭ الدىمىزدا ناقتى مىندەت بار: ەرتەڭ نورۆەگيا قۇراماسىمەن وتەتىن ءبىرىنشى ويىنعا دايىندالۋ. مەن دايىندىق بارىسىندا كلۋبتارمەن جانە ويىنشىلارمەن بەلسەندى ارالاسىپ، ولاردىڭ فورماسى مەن جاتتىعۋ بارىسىن باقىلاپ وتىرامىن. كىمنىڭ جاقسى فورمادا ەكەنىن انىقتاۋ ءۇشىن 25 فۋتبولشىنى شاقىردىم، ونىڭ ىشىندە ويىن دەڭگەيى قانداي جوعارى ەكەنىن بىلەتىن تاجىريبەلى ويىنشىلار دا بار. بۇل ءبىزدىڭ ءبىرىنشى باسقوسۋىمىز. وكىنىشكە قاراي، تانىستىرۋ جيىنىن وتكىزە المادىق، سوندىقتان قولىمىزدا بارمەن جۇمىس ىستەپ جاتىرمىز. ماقسات - ماكسيمالدى ناتيجەگە جەتۋ. ءبىز ەندى س ليگاسىندا ەمەس، ۆ ليگاسىندامىز، ال قاعاز جۇزىندە قارسىلاستار بىزدەن مىقتىراق، مۇنى مويىنداۋىمىز كەرەك. ەرتەڭ ءبىرىنشى ءارى ماڭىزدى ويىن. ءبىز ءبارىن باسىنان باستايمىز جانە ۇلتتار ليگاسى ارقىلى الەم چەمپيوناتىنىڭ ىرىكتەۋ كەزەڭىنە دايىندالۋعا بار كۇشىمىزدى سالامىز»، - دەدى چەرچەسوۆ.

ايتا كەتەيىك، قازاقستان مەن نورۆەگيا اراسىنداعى ويىن 6-قىركۇيەكتە الماتىداعى «ورتالىق ستاديوندا» ۋەفا ۇلتتار ليگاسىنىڭ توپتىق كەزەڭى اياسىندا وتەدى.