ءبىرىنشى سىنىپقا قۇجات قابىلداۋ 1-ساۋىردە باستالادى

استانا. KAZINFORM - بيىل ءبىرىنشى سىنىپقا ءوتىنىش قابىلداۋ 1-ساۋىردە باستالىپ، 2024 -جىلدىڭ 31-تامىزىنا دەيىن جالعاسادى، دەپ حابارلايدى وقۋ-اعارتۋ مينيسترلىگىنىڭ باسپا ءسوز قىزمەتى.

اتا-انالار بالانىڭ قۇجاتتارىن ەلەكتروندىق ۇكىمەتتىڭ egov.kz ۆەب-پورتالى ارقىلى تاپسىرا الادى.

قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءبىلىم بەرۋ، تالىمگەرلىك جانە بالالاردىڭ قاۋىپسىزدىگى ماسەلەلەرى جونىندەگى زاڭىنا سايكەس ليتسەيلەر مەن گيمنازيالارعا ءبىرىنشى سىنىپقا قابىلداۋ كەزىندە ەمتيحان وتكىزۋگە تىيىم سالاتىن ەرەجە ەنگىزىلدى. بارلىق بالالار، دايىندىق دەڭگەيىنە قاراماستان، تەڭ مۇمكىندىكتەرگە يە بولادى. بۇل باستاما تەستىلەۋ مەن اڭگىمەلەسۋگە بايلانىستى ءبىرىنشى سىنىپ وقۋشىلارىنداعى پسيحولوگيالىق قىسىمدى ازايتۋعا باعىتتالعان، - دەپ اتاپ ءوتتى ورتا ءبىلىم كوميتەتىنىڭ باسقارما باسشىسى ءاليا چوكۋشەۆا.

بالالار ءبىرىنشى سىنىپقا التى جاستان باستاپ قابىلدانادى.

قانداي قۇجاتتار قاجەت:

- اتا-اناسى نەمەسە زاڭدى وكىلىنىڭ ءوتىنىشى؛

- №065ۋ فورماسىنداعى دەنساۋلىق جاعدايى تۋرالى انىقتاما؛

- 026/ۋ-3 بالانىڭ دەنساۋلىق پاسپورتى؛

- بالانىڭ ەكى دانا 3x4 فوتوسۋرەتى.

ءوتىنىش دەمالىس جانە مەرەكە كۇندەردى قوسپاعاندا، دۇيسەنبىدەن جۇماعا دەيىن قابىلدانادى.

جاڭا وقۋ جىلىندا ءبىرىنشى سىنىپقا 370 مىڭنان استام بالا بارادى دەپ كۇتىلىپ وتىر.