ءبىرىنشى اتوم ەلەكتر ستانسياسىن سالۋ ءۇشىن قازاقستان 10-12 ميلليارد دوللار جۇمسايدى

استانا. KAZINFORM - قازاقستاندا اتوم ەلەكتر ستانسياسىن سالۋ ۇسىنىسى رەفەرەندۋمدا ماقۇلدانسا، شامامەن 10-12 ميلليارد دوللار بولىنەدى.

بۇل تۋرالى ەنەرگەتيكا مينيسترلىگىنىڭ «بالامالى ەنەرگيا كوزدەرىن پايدالانۋ تۋرالى» ق ر زاڭىنىڭ جوباسىنا ارنالعان نورماتيۆتىك-قۇقىقتىق ساياسات جونىندەگى كونسۋلتاتيۆتىك قۇجاتىندا ايتىلعان.

قۇجاتقا سايكەس، قازاقستاندا ەنەرگەتيكا سالاسىندا ءبىرقاتار پروبلەما بار. اتاپ ايتساق، ەلەكتر جانە جىلۋ ەنەرگياسىن ءوندىرۋدىڭ جالپى كولەمىندە بالامالى جانە جاڭارتىلاتىن ەنەرگيا كوزدەرىنىڭ ۇلەسىنىڭ تومەندىگى، بالامالى ەنەرگەتيكانى دامىتۋ ءۇشىن قولايلى جاعدايلاردىڭ جوقتىعى، سونداي-اق بالامالى ەنەرگيا كوزدەرىن پايدالانۋ قىزمەتىن دامىتۋدى مەملەكەتتىك دەڭگەيدە زاڭنامالىق رەتتەۋدىڭ جوقتىعى.

وسىعان بايلانىستى سيپاتتالعان ماسەلەلەردىڭ كەلەسى شەشىمدەرى ۇسىنىلادى:

- بيزنەس- قوعامداستىقتى بالامالى ەنەرگيا كوزدەرىن پايدالانۋعا ىنتالاندىرۋ. 2029 -جىلعا قاراي جاڭارتىلاتىن ەنەرگيا كوزدەرىنەن الىناتىن ەلەكتر ەنەرگياسىنىڭ ۇلەسى جالپى ءوندىرىستىڭ 12,5 پايىزىن قۇرايتىنى اتاپ ءوتىلدى.

- بالامالى ەنەرگيا كوزدەرىنىڭ بارلىق تۇرلەرى بويىنشا جاڭارتىلاتىن ەنەرگيا كوزدەرى تۋرالى زاڭدا كوزدەلگەن پرەفەرەنتسيالاردى 2026 -جىلعا دەيىن كەڭەيتۋ.

- زاڭنامالىق دەڭگەيدە كومىرتەگىسىز بالامالى ەنەرگيا كوزى رەتىندە اتوم ەنەرگياسىن انىقتاۋ.

- قازاقستاندا 2040 -جىلعا قاراي 5 تريلليون تەڭگەگە دەيىن ينۆەستيتسيا تارتۋعا اكەلەتىن سۋتەگىن وندىرۋگە جاعداي جاساۋ.

قازاقستان بۇل ماسەلەنى زاڭنامالىق تۇرعىدان رەتتەۋگە ىنتالى. جالپىحالىقتىق رەفەرەندۋمدا اتوم ەلەكتر ستانساسىن سالۋ ماسەلەسى ماقۇلدانعان جاعدايدا بۇل نىسانعا 10-12 ميلليارد دوللار ينۆەستيتسيا سالىنادى دەپ كۇتىلۋدە.

قۇجات 27-شىلدەگە دەيىن قوعامدىق تالقىلاۋعا ۇسىنىلعان.

اۆتور

ورالحان قوجانوۆ