ءبىرىنشى ا ە س تولىعىمەن ۇلتتىق باقىلاۋدا بولادى

استانا. KAZINFORM - روساتوم سالاتىن ءبىرىنشى ا ە س تولىقتاي ۇلتتىق باقىلاۋدا بولادى. بۇل تۋرالى اتوم ەنەرگەتيكاسى جونىندەگى اگەنتتىكتەن ءمالىم ەتتى.

- بۇل تولىعىمەن ۇلتتىق باقىلاۋعا الىناتىن ءبىرىنشى قازاقستاندىق ا ە س بولادى. سەرىكتەس تاڭداۋ تاۋەلدىلىكتى بىلدىرمەيدى. قازاقستان اتوم ەنەرگەتيكاسىندا وزىندىك قۇزىرەتىن دامىتىپ جاتىر. ەلىمىز ۋران ءوندىرىرىسى بويىنشا الەمدە ءبىرىنشى ورىندا تۇر. يادرولىق وتىن وندىرەدى. ۇلتتىق كادرلاردى بەلسەندى دايىنداۋ، ينفراقۇرىلىم قۇرىپ جاتىر، - دەدى اگەنتتىكتەن ب ا ق وكىلدەرىنىڭ ساۋالىنا وراي.

جوبانى جۇزەگە اسىرۋ حالىقارالىق كونسورتسيۋمنىڭ قاتىسۋىن كوزدەيدى. بۇل تەحنولوگيالىق تۇراقتىلىقتى قامتاماسىز ەتىپ، ءبىر جەتكىزۋشىگە تاۋەلدىلىك تاۋەكەلىن تومەندەتەدى.

- بۇل رەتتە بارلىق نەگىزگى شەشىم قازاقستاننىڭ مۇددەسى مەن قاۋىپسىزدىگىن باسىمدىققا الا وتىرىپ، ۇلتتىق دەڭگەيدە قابىلدانادى. يەسى، وپەراتورى، بارلىق تەحنولوگيالىق شەشىمدەرگە جاۋاپ بەرۋشى، پايدالانۋشى ۇيىم قازاقستان تارابى بولادى، - دەدى ۆەدومستۆودان.

بۇعان دەيىن «روساتوم» كومپانياسى قازاقستانداعى العاشقى اتوم ەلەكتر ستانتسياسىن سالۋ جوباسى بويىنشا حالىقارالىق كونسورتسيۋمنىڭ كوشباسشىسى رەتىندە انىقتالعانىن جازعان ەدىك.
سونىمەن قاتار اتوم ەنەرگەتيكاسى جونىندەگى اگەنتتىك ءتوراعاسى الماسادام ساتقالييەۆ قازاقستانداعى تاعى ءبىر ا ە س- ءتى قىتايلىق ۆەندەر سالاتىنىن ءمالىم ەتتى.