ءبىرىڭعاي ساعات بەلدەۋى تابيعات ىرعاعىنا ورالۋعا مۇمكىندىك بەردى - مامان
استانا. KAZINFORM - «تسيركادتىق ىرعاق» - بۇل ادام دەنساۋلىعىنىڭ، جۇمىسقا قابىلەتتىلىگىنىڭ جانە ۇزاق ءومىر ءسۇرۋىنىڭ نەگىزى. بۇل تۋرالى ۇلتتىق قوعامدىق دەنساۋلىقتى ساقتاۋ ورتالىعىنىڭ باسقارما ءتوراعاسىنىڭ ورىنباسارى سالتانات نازاروۆا ايتتى.
«ادامنىڭ ومىرلىك پروتسەستەرى ۋاقىتقا (ساعات، كۇن، اپتا، اي، ماۋسىم نەمەسە جىل ىشىندە) بايلانىستى وزگەرەدى. بۇل وزگەرىستەر بيولوگيالىق ىرعاق دەپ اتالادى. «تسيركادتىق ىرعاق» - بۇل ءبىزدىڭ دەنساۋلىعىمىزدىڭ، جۇمىسقا قابىلەتتىلىگىمىزدىڭ جانە ۇزاق ءومىر ءسۇرۋىمىزدىڭ نەگىزى. كوپتەگەن شەتەلدىك زەرتتەۋلەر بيولوگيالىق ىرعاق اعزاداعى گورمونداردىڭ، فەرمەنتتەردىڭ جانە باسقا بەلسەندى زاتتاردىڭ دەڭگەيىن باسقاراتىندىعىن، سونىمەن قاتار قان قۇرامى مەن جالپى تەپە-تەڭدىكتى (گومەوستاز) ساقتايتىندىعىن كورسەتەدى»، - دەدى ول.
ونىڭ اتاپ وتۋىنشە، ۇيقى مەن سەرگەكتىكتى، دەمالۋ مەن بەلسەندىلىكتى، تاماقتانۋ مەن زات الماسۋدى رەتتەيتىن بيولوگيالىق ىرعاقتىق ۇيلەسىمدى جۇمىسى ادام دەنساۋلىعى ءۇشىن ماڭىزدى ءرول اتقارادى.
«ءبىرىڭعاي ۋاقىت بەلدەۋى بيولوگيالىق ساعاتتى سينحرونداۋ جانە رەسمي ۋاقىت پەن كۇندىزگى مەزگىلدى مۇمكىندىگىنشە جاقىنداتۋ ارقىلى ءومىردىڭ تابيعي ىرعاعىنا ورالۋعا مۇمكىندىك بەردى. بۇگىنگى تاڭدا الەمنىڭ 195 ەلىنىڭ 117 ءسى ستاندارتتى ساعات بەلدەۋىنە بارىنشا جاقىن گەوگرافيالىق ۋاقىت پايداسىنا تاڭداۋ جاسادى. ويتكەنى ادامنىڭ «تسيركادتىق ىرعاعى» كۇندىزگى تابيعي تسيكلمەن سينحروندالدى»، - دەدى سالتانات نازاروۆا.
ەسكە سالا كەتەيىك، 1-ناۋرىزدان باستاپ قازاقستاندا ۋاقىت ءبىر ساعات ارتقا جىلجىدى.
وسىدان كەيىن وزگەرىسكە قارسى شىققان قازاقستاندىقتار بۇرىن قولدانىستا بولعان ۋاقىت بەلدەۋىن قايتارۋ جونىندەگى پەتيتسيا جاريالادى. ستاندارتتى ۋاقىت بەلدەۋىنىڭ وڭ اسەرى تۋرالى نەگىزدەلگەن حالىقارالىق عىلىمي زەرتتەۋلەردى جانە ۋاقىتتىڭ اۋىسۋى حالىقتىڭ دەنساۋلىعىنا كەرى اسەر ەتكەنىن راستايتىن دەرەكتەردىڭ بولماۋى نەگىزىندە ساۋدا جانە ينتەگراتسيا مينيسترلىگى پەتيتسيانى قاناعاتتاندىرۋدان باس تارتۋ تۋرالى شەشىم قابىلدادى. كەشە ۇكىمەت وتىرىسىندا پرەمەر-مينيستر ولجاس بەكتەنوۆ ءبىرىڭعاي ۋاقىت بەلدەۋىنە بەكەردەن-بەكەر اۋىسپاعانىمىزدى اتاپ ءوتتى.