اباي وبلىسىنىڭ اۋماعىندا «قاڭعىباس» جەدەل-پروفيلاكتيكالىق ءىس-شاراسى وتكىزىلىپ جاتىر.
وبلىستىق پوليتسيا دەپارتامەنتى باسپا ءسوز قىزمەتىنىڭ مالىمەتىنشە، ونىڭ ماقساتى - قوعامدىق ءتارتىپتى قامتاماسىز ەتۋ عانا ەمەس، سونىمەن قاتار ومىرلىك قيىن جاعدايعا تاپ بولعان ادامدارعا دەر كەزىندە كومەك كورسەتۋ.
- جىل باسىنان بەرى سەمەي قالاسىندا پوليتسيا بولىمشەلەرىنە 228 ادام جەتكىزىلدى. ولاردىڭ 51 ءى ارنايى قابىلداۋ ورنىنا ورنالاستىرىلسا، 177 ازاماتتىڭ جەكە باسى انىقتالدى. ءار ساننىڭ ارتىندا - تاعدىرى بولەك ءبىر ادام تۇر. ءبىرى باسپاناسىنان ايىرىلسا، ەندى ءبىرى تۋعان-تۋىستارىمەن بايلانىسىن جوعالتقان. ال كەيبىرى العاش رەت ءوز بەتىنشە ەڭسەرە المايتىن قيىن جاعدايعا تاپ بولعان، - دەيدى ءتارتىپ ساقشىلارى.
پوليتسيا قىزمەتكەرلەرى قۇجاتتارى جوق ازاماتتاردىڭ جەكە باسىن انىقتاپ، قۇجاتتارىن قالپىنا كەلتىرۋگە، تىركەۋدەن وتۋگە، الەۋمەتتىك جانە قۇقىقتىق كومەك الۋعا جاردەمدەسەدى.
ۆەدومستۆو اتاپ وتكەندەي، مۇنداي جاعدايعا العاش رەت تاپ بولعان ادامدارعا ەرەكشە كوڭىل بولىنەدى.
- دەر كەزىندە كورسەتىلگەن كومەك ادامنىڭ جاقىندارىمەن قايتا قاۋىشىپ، ءومىرىن جاڭادان باستاۋىنا مۇمكىندىك بەرەدى. الايدا كوشەدە بىرنەشە رەت قالعان جانە ازىرگە كومەك قابىلداۋعا نەمەسە ءومىر سالتىن وزگەرتۋگە دايىن ەمەس ادامدار دا بار. مۇنداي ازاماتتارمەن جۇمىس جۇرگىزۋ ۋاقىتتى، سابىرلىلىقتى جانە پوليتسيا قىزمەتكەرلەرىمەن قاتار الەۋمەتتىك قىزمەتتەردىڭ دە قاتىسۋىن تالاپ ەتەدى. كەيدە وزگەرىسكە باستايتىن العاشقى قادام - قالپىنا كەلتىرىلگەن قۇجات، شىنايى اڭگىمە نەمەسە دەر كەزىندە سوزىلعان كومەك قولى بولۋى مۇمكىن، - دەيدى پوليتسەيلەر.
بۇعان دەيىن قوستانايدا ونداعان وتباسى باسپاناسىز قالعانىن جازعان ەدىك.