ءبىر توپ قۇرىلىسشى مەملەكەتتىك ناگرادالارمەن ماراپاتتالدى

استانا. KAZINFORM - قازاقستان رەسپۋبليكاسىنىڭ پرەزيدەنتى قاسىم-جومارت توقايەۆتىڭ جارلىعىمەن قۇرىلىسشى كۇنى قارساڭىندا وتاندىق قۇرىلىس سالاسىنداعى جەمىستى ەڭبەگى، ەلىمىزدىڭ ينفراقۇرىلىمدىق دامۋىنا قوسقان ۇلەسى ءۇشىن سالانىڭ ءبىر توپ جۇمىسشىسى مەملەكەتتىك ناگرادالارمەن ماراپاتتالدى، دەپ حابارلايدى اقوردانىڭ باسپا ءسوز قىزمەتى.

اتاپ ايتقاندا، 4 ازامات «پاراسات» وردەنىنىڭ جانە 36 ادام «قۇرمەت» وردەنىنىڭ كاۆالەرى اتاندى. 40 جۇمىسشى Ⅲ دارەجەلى «ەڭبەك داڭقى» وردەنىمەن ماراپاتتالىپ، 72 قۇرىلىسشى «ەرەن ەڭبەگى ءۇشىن» مەدالىنىڭ يەگەرى بولدى.

ايتا كەتەيىك، ەلىمىزدە قۇرىلىسشى كۇنى تامىزدىڭ ەكىنشى جەكسەنبىسىندە اتالىپ وتەدى.

قۇرىلىس يندۋسترياسى - ەكونوميكانىڭ نەگىزگى ىرگەتاسى. كەز كەلگەن ەلدىڭ ەكونوميكالىق كۇش-قۋاتى مەن الەۋمەتتىك تۇراقتىلىعى قۇرىلىس سالاسىنىڭ دامۋىنا تىكەلەي بايلانىستى. تاۋەلسىزدىك جىلدارى ەلىمىزدە قۇرىلىس سالاسىن دامىتۋعا بارىنشا جاعداي جاسالدى. وتاندىق قۇرىلىس يندۋسترياسى قانات جايىپ، قۇرىلىس ماتەريالدارىن شىعاراتىن ءوندىرىس ورىندارى كوبەيدى.

ەلىمىزدەگى قۇرىلىس سالاسىنىڭ قارقىندى دامۋى - ەلوردانى الماتىدان اقمولاعا كوشىرۋ تاريحي شەشىمىمەن تىكەلەي بايلانىستى. سونىڭ ارقاسىندا بۇگىندە استانادا وزىق تەحنولوگيالارمەن سالىنعان ساۋلەت ونەرىنىڭ زاماناۋي ۇلگىلەرى - ەرەكشە عيماراتتار بوي كوتەرگەن.

اۆتور
ەربول جانات