ءبىر توپ ۋكراينالىق بالا جازعى دەمالىسىن قازاقستاندا وتكىزەدى

استانا. KAZINFORM - «بالداۋرەن» رەسپۋبليكالىق وقۋ-ساۋىقتىرۋ ورتالىعىنا ۋكراينادان ءبىر توپ بالا دەمالىپ، وڭالتۋدان وتۋگە كەلدى. بۇل تۋرالى اتالعان ورتالىق حابارلايدى.

«بالداۋرەن» حالىقارالىق ىنتىماقتاستىقتى كەڭەيتىپ جاتىر، بالالاردىڭ دەمالىسىن ۇيىمداستىرۋدا مول تاجىريبەسى بار ورتالىق شەتەلدىك بالالاردى دا قابىلداي وتىرىپ، مادەني بايلانىستى دامىتۋعا ەرەكشە كوڭىل بولەدى.

- ورتالىق جۇمىس ىستەگەن جىلدار ىشىندە مۇندا الەمنىڭ 15 ەلىنەن كەلگەن بالالار دەمالدى. سوڭعى ءۇش جىلدىڭ ىشىندە «بالداۋرەن» ورتالىعى ت م د ەلدەرىنەن، قىتاي، تۇركيا، موڭعوليا جانە باسقا دا مەملەكەتتەردەن كەلگەن 700 دەن استام شەتەلدىك بالانى قابىلدادى. 3 -ماۋسىمدا قازاقستانعا دەمالىس پەن وڭالتۋدان ءوتۋ ءۇشىن ۋكراينادان بالالار توبى كەلدى. ولار ءۇشىن ءبىزدىڭ ەلىمىز تۋرالى تانىمىن كەڭەيتۋگە باعىتتالعان ءبىرقاتار ءىس-شارا جوسپارلانعان. اتاپ ايتقاندا، بالالار «بۋراباي» مەملەكەتتىك ۇلتتىق تابيعي پاركىنە ەكسكۋرسيا جاساپ، استانا قالاسىنداعى كورنەكتى ورىندارعا ساياحاتتايدى، - دەلىنگەن حابارلامادا.

اقپاراتتا ايتىلعانداي، مۇنداي ساپارلار بالالاردىڭ وي-ءورىسىن كەڭەيتىپ قانا قويماي، مادەنيەت ارالىق تۇسىنىستىك پەن ءوزارا قۇرمەتتى قالىپتاستىرۋعا، حالىقتار اراسىنداعى دوستىقتى نىعايتۋعا ىقپال ەتەدى.

- بالالىق شاق - باقىت مەكەنى. ونى بىرلەسە قورعاۋ جانە دامىتۋ - بارشاعا ورتاق مىندەت. قازاقستان ءار ەلدەن كەلگەن جاس قوناقتارعا ەسىگىن ايقارا اشا وتىرىپ، حالىقتار اراسىنداعى دوستىقتى قالىپتاستىرۋعا جانە سەنىمگە، قۇرمەتكە، جالپى ادامزاتتىق قۇندىلىقتارعا نەگىزدەلگەن الەمنىڭ نەگىزىن قالايتىن جاس ۇرپاقتى تاربيەلەۋگە ءوز ۇلەسىن قوسىپ كەلەدى، - دەپ حابارلايدى ورتالىق.

ايتا كەتەيىك، ەلىمىزدە بالالاردىڭ جازعى دەمالىسىن ۇيىمداستىرۋ ءۇشىن رەسپۋبليكالىق شتاب قۇرىلدى.

سونداي-اق بالالاردىڭ جازعى دەمالىسى ءۇشىن لاگەرلەرگە ارنالعان جول كارتاسى بەكىتىلدى.

اۆتور

داۋلەت ىزتىلەۋ