ءبىر رەت شاش قيۋىنا 21 مىڭ دوللار جۇمسايدى. برۋنەي سۇلتانى قالاي ءومىر سۇرەدى؟

استانا. قازاقپارات - كەشە، 15-شىلدە - برۋنەي سۇلتانى كۇنى. بۇل مەرەكە XIV عاسىردان بەرى بيلەپ كەلە جاتقان ديناستيانىڭ 29-وكىلى حاسسانال بولكياحتىڭ تۋعان كۇنىنە وراي بەكىتىلگەن، - دەپ حابارلايدى bugin.kz پورتالى lenta.ru سايتىنا سىلتەمە جاساپ.

برۋنەي سۇلتانى بولكياح 1946 -جىلى 15-شىلدەدە دۇنيەگە كەلگەن. 1968 -جىلى تاققا وتىردى. ول ءوزىن برۋنەي پرەمەر-ءمينيسترى، ەلدىڭ قورعانىس، سىرتقى ىستەر جانە قارجى ءمينيسترى قىزمەتتەرىنە تاعايىنداعان.

سۇلتان ءۇش رەت ۇيلەنگەن. ونىڭ 12 بالاسى بار. حاسسانال بولكياح قازىر ءبىرىنشى ايەلى اناك سالەحپەن نەكەدە.

مونارحتىڭ اينالاسىنداعىلار ونىڭ شاشتارازعا جەكە ۇشاقپەن باراتىنىن ايتادى. ءبىراق ماماننىڭ قاي ەلدە تۇراتىنى بەيمالىم. ونىڭ ءبىر رەت شاش قيۋىنا 21 مىڭ دوللار جۇمسالادى ەكەن.

برۋنەي سۇلتانىنىڭ بادمينتون جاتتىقتىرۋشىسى جىلىنا 1,42 ميلليون دوللار الادى. ءدال وسىنداي قارجىنى مونارح تۇراقتى ماسساج بەن ينەمەن ەمدەلۋگە دە جۇمسايدى.

برۋنەي سۇلتانى حاسسانال بولكياحتىڭ بايلىعى 2023 -جىلعى دەرەك بويىنشا 30 ميلليارد دوللاردى قۇراعان. مونارحتىڭ 7000 كولىگى بار. ونىڭ ىشىندەگى 500 ى Rolls Royce جانە 300 ى Ferrari ماركالى اۆتوكولىك. وعان قوسا جەكە ۇشاقتار پاركى بار.

مونارح وتباسىمەن بىرگە كولەمى ۆاتيكان مەملەكەتىمەن بىردەي ءزاۋلىم سارايدا تۇرادى. 1984 -جىلى 400 ميلليون دوللارعا سالىنعان سارايى 200000 م² اۋماقتى الىپ جاتىر. وندا 1788 جاتىن جانە 257 جۋىناتىن بولمە، 5000 ورىندىق مەملەكەتتىك زال، 1500 ادامدىق مەشىت، 110 كولىككە ارنالعان گاراج بار.

2022 -جىلدىڭ 8-قىركۇيەگىنەن باستاپ، ۇلى بريتانيا پاتشايىمى ەليزاۆەتا II قايتىس بولعاننان كەيىن حاسسانال بولكياح تاريحتاعى ەلدى ۇزاق ۋاقىت باسقارعان مونارحتار تىزىمىندە ءبىرىنشى ورىندا.