ⅩⅩ عاسىردىڭ باسىندا گەرمانيادا كوفە تانىمال سۋسىنعا اينالىپ كەلە جاتقان. درەزدەندە تۇراتىن مەليتتا بەنس تە كوفەنى جاقسى كورەتىن. ءبىراق ونىڭ ءبىر ماسەلەسى بار ەدى: كەسەنىڭ تۇبىندە قالاتىن كوفە تۇنباسى جانە سۋسىننىڭ اشى ءدامى وعان ۇنامايتىن. ول ماسەلەنى شەشۋدىڭ ءتۇرلى جولىن ىزدەي باستايدى.
اقىرى ۇيدەگى قاراپايىم زاتتاردى پايدالانىپ تاجىريبە جاساۋعا كىرىسەدى. مەليتتا جەز ىدىستىڭ ءتۇبىن بىرنەشە جەردەن تەسىپ، ونىڭ ىشىنە ۇلىنىڭ مەكتەپ داپتەرىنەن الىنعان سورعىش قاعازدى ورنالاستىرادى. ۇستىنە ۇنتاقتالعان كوفە سالىپ، ىستىق سۋ قۇيادى.
سۋ قاعاز ارقىلى ءوتىپ، كوفە تۇنباسى سۇزگىدە قالادى. وسىلايشا كەسەدە تۇنباسى جوق، ءدامى جۇمساعىراق كوفە پايدا بولادى. بۇل - قازىرگى قاعاز فيلتردىڭ العاشقى نۇسقاسى ەدى. ياعني بۇگىنگى فيلتر-كوفەنىڭ تاريحى زەرتحانادا ەمەس، ۇيدەگى قاراپايىم تاجىريبەدەن باستالعان.
72 پفەننيگپەن باستالعان كاسىپ
مەليتتا بۇل جاڭالىقتى ءۇي جاعدايىنداعى تاجىريبە رەتىندە قالدىرماي، ونىڭ كوممەرتسيالىق مۇمكىندىگىن ءتۇسىندى.
1908 -جىلعى 20-ماۋسىمدا گەرمانيانىڭ يمپەراتورلىق پاتەنت كەڭسەسى ونىڭ كوفەگە ارنالعان سۇزگىسىنە پايدالى مودەل رەتىندە قۇقىقتىق قورعاۋ بەردى.
سول جىلدىڭ 15-جەلتوقسانىندا مەليتتا مەن كۇيەۋى حۋگو بەنس ءوز كاسىپتەرىن درەزدەندە رەسمي تىركەدى. باستاپقى كاپيتالى نەبارى 72 رەيحسفەننيگ بولدى.
ال ولاردىڭ العاشقى «كەڭسەسى» - وزدەرى تۇراتىن بەس بولمەلى پاتەردىڭ ءبىر بولمەسى. العاشقى سۇزگى كورپۋستارى مەتالل زاۋىتىندا جاسالىپ، سۇزگى قاعازىن باسقا وندىرۋشىدەن العان.
كوشەدە قولاربا سۇيرەپ جۇرگەن ەكى بالا
كاسىپتىڭ العاشقى كەزەڭىندە وتباسىنىڭ بارلىق مۇشەسى جۇمىسقا ارالاستى.
حۋگو بەنس دۇكەندەردى ارالاپ، جاڭا سۇزگىنىڭ قالاي جۇمىس ىستەيتىنىن كورسەتىپ، ءونىمدى ساتۋعا تىرىستى. كەيىن دۇكەندەردىڭ ۆيترينالارىنا ارنايى دەمونستراتسيالار ۇيىمداستىردى.
ال مەليتتا سۇزگىنى تانىستىرۋدىڭ تاعى ءبىر ءادىسىن تاپتى - جەكە ۇيلەردە كوفە دايىنداپ، ادامدارعا جاڭا ءتاسىلدى كورسەتكەن.
ال ولاردىڭ ەكى ۇلى ۆيللي مەن حورست دايىن ونىمدەردى العاشقى كليەنتتەرگە قولارباعا سالىپ، وزدەرى جەتكىزدى. بۇگىندە بۇل قاراپايىم كورىنۋى مۇمكىن. ءبىراق سول كەزدە ادامدارعا جاڭا ءونىمدى ءتۇسىندىرۋدىڭ ءوزى ۇلكەن جۇمىس ەدى. سوندىقتان وتباسى تاۋاردى جاساپ قانا قويماي، ونى وزدەرى تانىستىرىپ، ساتىپ، جەتكىزدى.
1909 -جىلى ولار ونىمدەرىن لەيپسيگ جارمەڭكەسىنە الىپ باردى. ناتيجەسىندە 1200 دەن استام سۇزگى ساتىلدى. وسىدان كەيىن شاعىن وتباسىلىق كاسىپكە دەگەن سۇرانىس ارتا ءتۇستى.
ءبىرىنشى دۇنيەجۇزىلىك سوعىس بيزنەستى توقتاتۋعا شاق قالدى
كاسىپ دامي باستاعانىمەن، وتباسى الدىندا ۇلكەن قيىندىقتار تۇردى.
ءبىرىنشى دۇنيەجۇزىلىك سوعىس كەزىندە گەرمانياعا كوفە يمپورتى توقتادى، قاعاز تاپشى بولدى. حۋگو بەنس پەن ونىڭ ۇلى مايدانعا اتتاندى. مەليتتا كاسىپتى ءىس جۇزىندە جالعىز ءوزى ۇستاپ قالۋعا ءماجبۇر بولدى.
كوفە فيلترلەرىنە سۇرانىس تومەندەگەندىكتەن، ءوندىرىس كارتون ونىمدەرىنە اۋىستى. سوعىس اياقتالعاننان كەيىن كاسىپ قايتا جاندانا باستادى.
1923 -جىلى ۇلكەن ۇلى ۆيللي كومپانيانىڭ ورتاق يەلەرىنىڭ ءبىرى بولدى. كەيىن وتباسى كاسىبى قايتادان قارقىن الدى.
1929 -جىلى كومپانيا درەزدەننەن ماينداعى ميندەن قالاسىنا كوشتى. ال 1932 -جىلى كاسىپ «Melitta-Werke AG» اتاۋىن الدى.
«مەليتتا» اتاۋى قالاي برەندكە اينالدى؟
مەليتتا وتباسى ءونىمدى ويلاپ قانا قويماي، ونى برەند رەتىندە قورعاۋعا دا ەرتە كىرىستى.
1911 -جىلى «Melitta» اتاۋى كوفە فيلترلەرىنە ارنالعان تاۋار بەلگىسى رەتىندە تىركەلدى. ونىڭ قۇقىقتىق قورعالۋى بۇگىنگە دەيىن ساقتالعان.
1925 -جىلى كومپانيا قىزىل- جاسىل ءتۇستى قاپتامانى ەنگىزىپ، ونى دا تاۋار بەلگىسى رەتىندە قورعادى. بۇل باسەكەلەستەردىڭ ءونىمدى كوشىرۋىنە قارسى جاسالعان قادام ەدى.
ال 1930-جىلدارى سۇزگىنىڭ ءوزى دە جەتىلدىرىلدى. كومپانيا قاعاز سۇزگىنىڭ جاڭا پىشىندەرىن جاساپ، كەيىن قازىرگى كونۋس ءتارىزدى سۇزگىگە جاقىن ۇلگىلەردى پاتەنتتەدى.
ەكىنشى دۇنيەجۇزىلىك سوعىستان كەيىن دە جالعاستى
ەكىنشى دۇنيەجۇزىلىك سوعىس كەزىندە كومپانيا تاعى دا اۋىر كەزەڭدى باستان وتكەردى. گەرمانيانىڭ پاتەنت جانە تاۋار بەلگىلەرى جونىندەگى ۆەدومستۆوسىنىڭ دەرەگىنە سايكەس، سول كەزەڭدە Melitta ءوندىرىسى سوعىس قاجەتىنە بەيىمدەلىپ، قازان مەن تابا سياقتى ونىمدەر شىعارۋعا كوشكەن. كومپانيادا ءماجبۇرلى ەڭبەك قولدانىلعانى دا تاريحي دەرەكتەردە كورسەتىلەدى.
سوعىس اياقتالعاننان كەيىن ءوندىرىس قايتا جانداندى. 1947 -جىلى Melitta ءونىم ءوندىرىسىن قايتا باستادى.
وسىلايشا ءبىر كەزدەرى درەزدەندەگى وتباسىنىڭ پاتەرىنەن باستالعان شاعىن كاسىپ ەكى دۇنيەجۇزىلىك سوعىستىڭ قيىندىقتارىنان ءوتىپ، حالىقارالىق كومپانياعا اينالدى.
ءبىر يدەيادان - ۇلكەن كومپانياعا دەيىن
مەليتتا بەنس 1950 -جىلى قايتىس بولدى. ءبىراق ونىڭ باستاعان كاسىبى وتباسى قولىندا قالا بەردى.
كەيىن كومپانيا كوفە دايىنداۋدىڭ باسقا دا باعىتتارىن دامىتتى. 1962 -جىلى گەرمانيا نارىعىندا ۇنتاقتالعان كوفەنى ۆاكۋۋمدىق قاپتامادا العاشقىلاردىڭ ءبىرى بولىپ ۇسىندى. ال 1965 -جىلى العاشقى ەلەكترلىك كوفە ماشينالارىنىڭ ءبىرىن تانىستىردى.
بۇگىندە Melitta - كوفە، كوفە دايىنداۋ قۇرىلعىلارى جانە تۇرمىستىق ونىمدەر شىعاراتىن حالىقارالىق، وتباسىلىق كومپانيا. ونىڭ قۇرامىندا بىرنەشە كومپانيا جانە مىڭداعان قىزمەتكەر بار. ال بارلىعى ءبىر ايەلدىڭ كوفە تۇنباسىن ۇناتپاۋىنان باستالدى.
مەليتتا بەنسكە زاماناۋي كوفەماشينانىڭ اۆتورى دەۋدەن گورى، قازىرگى فيلتر ارقىلى كوفە دايىنداۋ ءادىسىنىڭ نەگىزىن قالاعان ونەرتاپقىش دەگەن دۇرىس.
ويتكەنى ونىڭ العاشقى «قۇرىلعىسى» - جەز ىدىس، بىرنەشە تەسىك جانە بالاسىنىڭ داپتەرىنەن الىنعان ءبىر پاراق قاعاز عانا ەدى.
كەيدە ۇلكەن بيزنەستىڭ باستاۋى ۇلكەن ينۆەستيتسيادان ەمەس، كۇندەلىكتى ومىردەگى كىشكەنتاي ماسەلەنى شەشۋدەن باستالادى.
el.kz