ءبىر جانكۇيەردىڭ ارمانى: مەكسيكادا ديماشتىڭ مۋرالى قالاي پايدا بولدى

استانا. KAZINFORM - مەكسيكانىڭ مونتەررەي قالاسىنداعى ديماش قۇدايبەرگەن بەينەلەنگەن مۋرال قالا اۋماعىنان تىس جەرلەرگە دە كەڭىنەن تانىلىپ ۇلگەردى، دەپ حابارلايدى dimashnews.

Фото: dimashnews

14-قاراشاداعى كونسەرتتەن كەيىن قازاقستاندىق ءانشى وسى ورىنعا ارنايى كەلىپ، دوستارىمەن بىرگە جانكۇيەرلەرىنە مۋزىكالىق تارتۋ ازىرلەدى. الايدا قازاقستان مەن مەكسيكانىڭ سيمۆولىنا اينالعان بۇل جارقىن تۋىندىنىڭ تاريحى اتالعان وقيعادان الدەقايدا بۇرىن باستالعان ەدى.

ءبىر جانكۇيەردىڭ يدەياسىنان ورتاق جوباعا دەيىن

بارلىعى 2025-جىلى جەرگىلىكتى Dears Regias MTY فان-كلۋبىنىڭ مۇشەسى برەندا لورەنا ەسكاميليا مارتينەستىڭ باستاماسىنان باستالدى. ول مونتەررەي تۇرعىندارىن ديماشتىڭ ونەرىمەن كەڭىنەن تانىستىرۋدى ارمانداپ، قالادا ءانشىنىڭ بەينەسى سالىنعان مۋرال جاساۋدى ۇسىنادى.

بۇل ويدى جۇزەگە اسىرۋ ءۇشىن قولايلى ورىن تابۋ قاجەت بولادى. جانكۇيەرلەر بىرنەشە اي بويى قالانىڭ ادام كوپ جۇرەتىن، قولجەتىمدى ءارى كوزگە بىردەن تۇسەتىن بولىگىنەن قابىرعا ىزدەيدى.

Фото: dimashnews

اقىرىندا ولار مونتەررەيدىڭ Callejَn Cultural دەپ اتالاتىن مادەنيەت تۇيىق كوشەسىن تاڭدايدى. بۇل ورىن كونە بۇيىمدار، قولونەر تۋىندىلارى مەن جەرگىلىكتى شەبەرلەردىڭ ونىمدەرى ساتىلاتىن ءداستۇرلى جەكسەنبىلىك بازارىمەن تانىمال.

عيمارات يەسىنىڭ رۇقساتىن العاننان كەيىن فان-كلۋب مۇشەلەرى بولاشاق كومپوزيتسيانى ازىرلەۋگە كىرىستى. باستامانى جۇزەگە اسىرۋعا برەندانىڭ جۇبايى، كاسىبي مۋرال سۋرەتشىسى انتونيو رەينا ترۋحيلو كومەكتەسەدى.

Dears Regias مۇشەلەرى مۋرالدى قالاي جاسادى؟

جۇمىس سۋرەت سالۋدان ەمەس، قابىرعانى دايىنداۋدان باستالدى. ەسكى بوياۋدى كەتىرىپ، قابىرعا بەتىن تازارتۋ جانە اق ءتۇستى استار جاعۋ قاجەت بولدى.

ديماشتىڭ جانكۇيەرلەرى بوس ۋاقىتتارىن وسى جوباعا ارناپ، كەشكى ۋاقىتتا جانە دەمالىس كۇندەرى باس قوسىپ ءجۇردى. دايىندىق كەزەڭى اياقتالعاننان كەيىن انتونيو كومپوزيتسيانىڭ نوبايىن تۇسىرەدى، ال فان-كلۋب مۇشەلەرى ونىڭ ءىرى بولىكتەرىن بوياۋعا كومەكتەسەدى.

سولاردىڭ ءبىرى - مونتەررەيدىڭ باستى نىشاندارىنىڭ ءبىرى سانالاتىن ايگىلى سەررو-دە- لا- سيليا، ياعني ەرتوقىم ءپىشىندى تاۋ بەينەسى ەدى.

Фото: dimashnews

جۇمىستىڭ قورىتىندى كەزەڭىن سۋرەتشى ءوزى اتقاردى: ول ديماش پورترەتىنىڭ كەسكىن سىزىقتارى مەن ۇساق بولشەكتەرىن مۇقيات وڭدەپ، ورتاق يدەيانى بىرتىندەپ اياقتالعان كوركەم تۋىندىعا اينالدىردى.

العاشقى مۋرال 2025-جىلى ونەرپازدىڭ 31 جاسقا تولۋىنا وراي جاسالدى.

كومپوزيتسياعا ديماشتىڭ جانكۇيەرلەرىنە دەگەن كوزقاراسىن بىلدىرەتىن مىنا سوزدەرى دە ەنگىزىلدى.

- قۇرمەتتى Dears - ادامداردىڭ ءبىر-بىرىمەن شەكاراعا بولىنبەي، قالاي دوس بولۋى كەرەكتىگىنىڭ ۇلگىسى. ءبىز ءبارىمىز ءبىر اسپان استىندا ءومىر سۇرەمىز، - دەلىنگەن جازبادا.

مۋرال اۆتورلارى ءۇشىن بۇل سوزدەر جوبانىڭ نەگىزگى يدەيالارىنىڭ بىرىنە اينالىپ، مۋزىكا بىرىكتىرگەن ءتۇرلى ۇلت وكىلدەرىنىڭ دوستىعىن ايشىقتادى.

جاڭا كەزەڭ: قازاقستان مەن مەكسيكا نىشاندارىنىڭ ءبىر كومپوزيتسيادا توعىسۋى

Фото: dimashnews

2026-جىلى ديماشتىڭ DIMENSIONS الەمدىك تۋرى اياسىنداعى مەكسيكا كونسەرتتەرى قارساڭىندا جانكۇيەرلەر قولدانىستاعى مۋرالدى كەڭەيتۋدى ۇيعاردى.

جوباعا انتونيو رەينا ترۋحيلو قايتا قوسىلدى. بۇل جولى وزگەرىستەر سۋرەتتىڭ كولەمىمەن عانا شەكتەلمەدى. جانكۇيەرلەر كوركەمدىك دەتالدار ارقىلى ەكى ەل اراسىنداعى بايلانىستى ايقىنداۋدى كوزدەدى.

جاڭارتىلعان كومپوزيتسيادا ديماشتىڭ مەكسيكا تۋىمەن بەينەلەنگەن پورترەتى ورىن الدى. بۇل - ونەرپازبەن مەكسيكا جەرىندە قاۋىشۋدىڭ قۋانىشىن بىلدىرەتىن نىشان.

اينالاسىنداعى پەيزاج دا وزگەردى. سۋرەتشى سەررو- دە- لا- سيليا تاۋىنىڭ بەينەسىن ۇلكەيتىپ، اسپاننىڭ تۇستىك رەڭكتەرىن جاڭارتىپ، وعان قازاقستاننىڭ مەملەكەتتىك تۋىنداعى التىن كۇندى قوستى.

Фото: dimashnews

وسىلايشا ءبىر كوركەمدىك كەڭىستىكتە كوپشىلىككە تانىس ەكى نىشان - مونتەررەيدى بەينەلەيتىن تاۋ مەن ديماشتىڭ تۋعان ەلىن ەسكە سالاتىن كۇن توعىستى.

فان-كلۋب مۇشەلەرىنىڭ ايتۋىنشا، ولار وسى دەتالدار ارقىلى قازاقستانعا دەگەن قۇرمەتىن ءبىلدىرىپ، مۋزىكانىڭ ارالارىن مىڭداعان شاقىرىم ءبولىپ جاتقان مادەنيەتتەردى جاقىنداستىرا الاتىنىن كورسەتكىسى كەلگەن.

جانكۇيەرلەردىڭ باسىن قوسقان مۋرال

ۋاقىت وتە كەلە مۋرال اينالاسى ديماشتىڭ الەمنىڭ ءتۇرلى ەلدەرىندەگى جانكۇيەرلەرى باس قوساتىن ورىنعا اينالدى.

Фото: dimashnews

ولار مۇندا سۋرەتكە ءتۇسۋ ءۇشىن عانا كەلمەيدى. Dears بۇل جەردە كەزدەسۋگە ۋاعدالاسىپ، ءبىر-بىرىمەن تانىسىپ، ونەرپازدىڭ اندەرىن بىرگە شىرقاپ، كونسەرتتەردەن العان اسەرلەرىمەن بولىسەدى.

ديماشتىڭ ارنايى كەلۋى جوبا اۆتورلارى ءۇشىن ەرەكشە تارتۋ بولدى.

مونتەررەيدەگى كونسەرتىنەن كەيىن ونەرپاز دوستارىمەن بىرگە مۋرالعا ارنايى كەلىپ، Temirlan Yernat ءدۋەتىنىڭ رەپەرتۋارىنداعى «شەكسىزدىك» كومپوزيتسياسىنا مۋزىكالىق بەينەجازبا ءتۇسىردى.

Фото: dimashnews

بەينەجازباعا ديماش قۇدايبەرگەن، ەرنات ناۋرىز، تەمىرلان ولجاباي، سانجاي المىشيەۆ، ولجاس قۇرمانبەك جانە راسۋل ۋسمانوۆ قاتىستى. مەكسيكا كوشەسىندە قازاقتىڭ ۇلتتىق اسپاپتارى - دومبىرا، سىبىزعى مەن قوبىزدىڭ ءۇنى اۋەلەدى.

Фото: dimashnews

- وسىناۋ اسەم قالانىڭ ءبىر كوشەسىنەن ءوز بەينەم بەينەلەنگەن مۋرالدى كورۋ -مەنىڭ جادىمدا ماڭگى ساقتالاتىن سىي،-دەپ ديماش الەۋمەتتىك جەلىلەردە جانكۇيەرلەرىنە ولاردىڭ ىقىلاسى مەن ىستىق سەزىمدەرى ءۇشىن العىسىن ءبىلدىردى.