ءبىر ءتىلدى مەڭگەرگەن ادام ەكىنشى ءتىلدى دە تەز ۇيرەنەدى: اقتاۋلىق ۇستاز وزگە ءتىلدى مەڭگەرۋدىڭ سىرىن ايتتى

اقتاۋ. KAZINFORM - اقتاۋ قالاسىنىڭ تۇرعىنى گۇلبانۋ قۋانىشوۆا - بەس ءتىلدى جەتىك مەڭگەرگەن پوليگلوت ۇستاز. ءوزى اعىلشىن ءتىلى پانىنەن ساباق بەرەدى. وعان قوسا قازاق، ورىس، قىتاي جانە تۇرىك تىلدەرىندە ەركىن سويلەيدى. ءبىلىم سالاسىندا 9 جىلدىق ەڭبەك ءوتىلى بار مامان № 15-مەكتەپ-گيمنازيادا جۇمىس ىستەيدى.

«وزگە ءتىلدىڭ ءبارىن ءبىل، ءوز ءتىلىڭدى قۇرمەتتە» دەگەن ءسوزدىڭ جانى بار. ءتىل - پىكىر الماساتىن، وي بولىسەتىن قۇرال. بالا كەزدەن بىرنەشە ءتىلدى بىلسەم، شەتەلگە ساياحاتتاسام دەگەن ارمانىم بولدى. وسى ارمانىم مەنى بىرنەشە ءتىلدى ۇيرەنۋگە جەتەلەدى»، - دەيدى گۇلبانۋ قۋانىشوۆا.

گۇلبانۋ ق. جۇبانوۆ اتىنداعى اقتوبە وڭىرلىك ۋنيۆەرسيتەتىندە ءبىلىم العان. باكالاۆردا وقىپ جۇرگەندە، ارنايى باعدارلامامەن قىتاي حالىق رەسپۋبليكاسىنىڭ شىڭجاڭ قارجى-ەكونوميكالىق ۋنيۆەرسيتەتىندە 2 جىل قىتاي ءتىلىن وقىدى. وقۋدى اياقتاعان سوڭ، اعىلشىن- قىتاي ءتىلى مامانى اتاندى.

«ەكى جىل اقتوبەدە، ەكى جىل قىتايدا ءبىلىم العان سوڭ، ۋنيۆەرسيتەتتە حالىقارالىق ورتالىقتا جۇمىس ىستەدىم. شەتەلدىك عالىمدارمەن، پروفەسسورلارمەن پىكىر الماسىپ، بىرىگىپ جۇمىس ىستەدىك. وسىلايشا، اعىلشىن، قىتاي تىلىندە ەركىن سويلەپ، ويىمدى تياناقتى جەتكىزىپ ۇيرەندىم. كەيىن حالىقارالىق ورتالىقتا باۋىرلاس تۇركيا مەملەكەتىمەن ىسكەرلىك قارىم-قاتىناس ورناتتىق. جۇمىس بابىنا وراي تۇرىك ءتىلىن دە ۇيرەنۋىم كەرەك بولدى. دەن قويىپ، تۇرىك ءتىلىن دە وقىدىم. كەيىن تاعىلىمدامالارعا بارىپ، تاجىريبە الماسىپ، ەركىن سويلەپ كەتتىم»، - دەيدى پوليگلوت مۇعالىم.

گۇلبانۋ ءتىلدى جەتىك ۇيرەنۋ ءۇشىن نيەت پەن قىزىعۋشىلىق كەرەك دەيدى.

«ءتىلدى ۇيرەنۋ ءۇشىن ۇلكەن نيەت پەن شىنايى قىزىعۋشىلىق كەرەك. شەتەل تىلدەرىن وقىپ باستاعان ادامدارعا ەڭ الدىمەن سول ەلدىڭ مادەنيەتىمەن، سالت-داستۇرىمەن، تۇرمىس- تىرشىلىگىمەن تانىسقان دۇرىس. سوندا عانا ءتىلدى تەز ءارى وڭاي ۇيرەنۋگە بولادى. ءبىر جاڭا ءتىلدى جەتىك بىلگەن وقۋشىلارىما، زامانداستارىما ەكىنشى جاڭا ءتىل ۇيرەنىڭىزدەر دەپ كەڭەس بەرەمىن. ويتكەنى، ءبىر ءتىلدى مەڭگەرگەن ادام ەكىنشى ءتىلدى دە تەز ۇيرەنىپ كەتەدى. ونىڭ ۇستىنە جاھاندانۋ، جاڭا تەحنولوگيالار زامانى دا ءتىل ءبىلۋدى تالاپ ەتەدى. دارىگەر بولساڭىز دا، ينجەنەر بولساڭىز دا ءتىل ءبىلۋ ارتىق ەمەس»، - دەيدى ول.

گۇلبانۋ وقۋشىلارىنىڭ ءبىلىم قۋعان باسەكەگە قابىلەتتى مامان بولعانىن قالايدى.

«وقۋشىلارىمدى تەك مەكتەپ باعدارلاماسىمەن وقىتپايمىن. ءتىل ۇيرەنۋگە دەگەن قىزىعۋشىلىقتارىن وياتۋ ماقساتىندا وسى كۇنگە دەيىن بىرگە جۇمىس ىستەگەن شەتەلدىك ارىپتەستەرىممەن ونلاين كەزدەسۋلەر، ۆيدەو فورماتتا ساباق ماتەريالدارىن ۇيىمداستىرامىن. ويتكەنى، اتا ءتىلىن قادىرلەيتىن، بىرنەشە ءتىلدى جەتىك مەڭگەرگەن ازاماتتاردىڭ وسكەنىن قالايمىن. وقۋشىلارىما تىلدىك كۋرستاردان وتۋگە، تەگىن تاعىلىمدامالارعا قاتىسۋعا ءارقاشان كەڭەس بەرەمىن»، - دەيدى گۇلبانۋ قۋانىشوۆا.

اۆتور
اياگوز ءىزباساروۆا