قۋانىش پەن مۇڭنىڭ، ءۇمىت پەن وكىنىشتىڭ قاتار جۇرەتىنىن ساناعا سىڭىرگەن «وكىنبە سەن» ءانى بۇگىندە جۇبانىش جەكسەن ۇلىنىڭ ورىنداۋىمەن كەڭىنەن تانىس. الايدا شىعارمانىڭ تاريحى ءانشى ونى ساحناعا الىپ شىققان كەزەڭنەن الدەقايدا ەرتەرەك باستالادى.
«وكىنبە سەن» ءانىنىڭ ءسوزىن اقىن ءشومىشباي ساريەۆ، مۋزىكاسىن كومپوزيتور كەڭەس دۇيسەكەيەۆ جازعان. بۇل كەزەڭ كەڭەس دۇيسەكەيەۆتىڭ شىعارماشىلىق جولىنىڭ باستاۋىنداعى ءونىمدى جىلداردىڭ ءبىرى ەدى. كومپوزيتور كونسەرۆاتوريانى 1974-جىلى اياقتاپ، كوپ ۇزاماي قازاق ەستراداسىنا وزىندىك قولتاڭباسىمەن تانىلا باستادى. «وكىنبە سەن» دە سول العاشقى كەزەڭدەگى شىعارمالارىنىڭ قاتارىنان ورىن الدى. ءشومىشباي ساريەۆ پەن كەڭەس دۇيسەكەيەۆتىڭ شىعارماشىلىق بايلانىسى كەيىن قازاق ءان ونەرىنە كوپتەگەن تانىمال تۋىندى سىيلادى. «قاراعىم- اي»، «سالەم ساعان، تۋعان ەل»، «دومبىرا تۋرالى باللادا»، «عاشىقتار جىرى»، «ەركەلەدىڭ سەن» سەكىلدى اندەر دە وسى ەكى اۆتوردىڭ شىعارماشىلىق بىرلىگىنەن تۋعان.
«وكىنبە سەن» سول قاتارداعى مازمۇنى تەرەڭ شىعارمالاردىڭ بىرىنە اينالدى. ءاننىڭ باستى ەرەكشەلىگى - ونىڭ بەلگىلى ءبىر ادامنىڭ باسىنان وتكەن وقيعاعا قۇرىلماۋىندا. شىعارمانىڭ وزەگىندە ءومىردىڭ ءبىر قالىپتا تۇرمايتىنى، ادام بالاسىنىڭ قۋانىشپەن بىرگە مۇڭدى دا باستان كەشىرەتىنى جاتىر. ماحاببات تا بۇل اندە تەك باقىت پەن شاتتىقتىڭ كورىنىسى رەتىندە بەرىلمەيدى. سەزىمنىڭ قۋانىشى بولعانى سەكىلدى، ساعىنىشى مەن وكىنىشى دە بار. ءبىراق قانداي كۇي كەشسە دە، ادام ءومىردىڭ وزىنەن تۇڭىلمەۋى كەرەك. ءاننىڭ «ومىرگە كەلگەنىڭە وكىنبە سەن» دەگەن ءتۇيىنى دە وسى ويعا جەتەلەيدى.
1976-جىلى ورىندالا باستاعان شىعارما بىردەن تۇراقتى رەپەرتۋارعا ورنىعىپ كەتە قويعان جوق. ۋاقىت وتە ءان ساحنادان سيرەپ، ءبىراز جىل كومەسكى تارتتى. ونىڭ جاڭا تىنىسى اراعا بىرنەشە ونجىلدىق سالىپ اشىلدى. بۇعان جۇبانىش جەكسەن ۇلىنىڭ ورىنداۋى ايرىقشا ىقپال ەتتى. جۇبانىش ءاندى ءوزىنىڭ قوڭىر داۋىسىمەن قايتا ۇسىنىپ، شىعارمانىڭ فيلوسوفيالىق سالماعىن جاڭا بۋىن تىڭدارمانعا جەتكىزدى. ءانشى 2000-جىلداردىڭ ورتاسىندا «وكىنبە سەندى» رەپەرتۋارىنا بەرىك ەنگىزدى. 2006 -جىلى وسى انگە بەينەبايان ءتۇسىرىپ، «وكىنبە سەن» اتاۋىمەن 3000 دانا كۇيتاباق شىعارعان. وسى كەزەڭنەن كەيىن شىعارما جۇبانىش جەكسەن ۇلىنىڭ ەسىمىمەن تىعىز بايلانىسىپ، ءانشىنىڭ ەڭ تانىمال تۋىندىلارىنىڭ بىرىنە اينالدى.
ءاننىڭ كەيىنگى تاعدىرىندا تاعى ءبىر قىزىق جايت بار. ءشومىشباي ساريەۆ جازعان ءتۇپنۇسقادا سوڭعى شۋماقتىڭ ءبىر تارماعى «باقىت بولىپ» دەگەن تىركەسپەن اياقتالعان. جۇبانىش جەكسەن ۇلىنىڭ ورىنداۋىندا ول «باقىتىم بوپ» تۇرىندە ايتىلىپ كەتتى. ءبىر عانا تاۋەلدىك جالعاۋى شىعارمانىڭ قابىلدانۋىنا ەلەۋلى اسەر ەتتى. ءتۇپنۇسقاداعى وي جالپى ادام ومىرىندەگى باقىت تۋرالى بولسا، كەيىنگى نۇسقادا ول ناقتى ءبىر ادامعا باعىتتالعان ماحاببات سوزىنە جاقىنداي ءتۇستى. ال كەيىنگى جىلدارى شىعارما باسقا انشىلەردىڭ رەپەرتۋارىندا دا ورىندالىپ كەلەدى. سوعان قاراماستان كوپشىلىك جادىندا ونىڭ جۇبانىش جەكسەن ۇلىنىڭ داۋىسىمەن ساقتالۋى زاڭدى. كەزىندە ءبىراز ۋاقىت ۇمىت قالعان ءان ءدال وسى ورىنداۋ ارقىلى جاڭا بۋىنعا جەتتى.
Qazaqstan tarihy