«ءبىر بەلدەۋ - ءبىر جول»: قىتاي CNS اگەنتتىگى Kazinform مەن بىرلەسىپ جۇمىس ىستەۋگە نيەتتى

قىتاي. قازاقپارات - CNS قىتاي مەملەكەتتىك اگەنتتىگى «Kazinform» حالىقارالىق اقپارات اگەنتتىگىمەن بىرلەسىپ جۇمىس ىستەۋگە نيەتتى. بۇل تۋرالى سينتسزيان فيليالى باس رەداكتورىنىڭ ورىنباسارى ۆان تسزيان شەن ايتتى.

ونىڭ ايتۋىنشا، Kazinform مەن CNS- ءتىڭ ۇقساس جاقتارى كوپ. بىرىنشىدەن، اقپاراتتى شىنايى ءارى شۇعىل جەتكىزەدى. ءوز ەلىنىڭ مەملەكەتتىك ساياساتىن ۇستاناتىن اگەنتتىكتەردىڭ مەديا سالاسىندا وزىندىك قولتاڭباسى بار.

شەتەلدىك اقپارات كوزدەرى، سونىڭ ىشىندە ءبىز دە، قازاقستان جاڭالىقتارىن Kazinform ارقىلى ءبىلىپ، سىلتەمە جاساپ، وزىمىزدە جاريالايمىز.

«قىتايدا Kazinform-نىڭ وقىرمانى كوپ. اقپارات بىرنەشە تىلدە شىعادى. بۇل كۇن سايىن قارىشتاپ دامىپ جاتقان مەديا سالاسىنىڭ تالابى. كوشتەن قالماي دامىپ جاتقان Kazinform اگەنتتىگىمەن بىرلەسىپ جۇمىس ىستەۋگە نيەتتىمىز. بىرىنشىدەن، اقپارات الماسۋ، ەكىنشىدەن، اگەنتتىك جۋرناليستەرىنە تاعىلىمدامادان وتۋگە جاعداي جاساۋ، ۇشىنشىدەن، «ءبىر بەلدەۋ - ءبىر جول» جوباسى اياسىندا ءتۇرلى فيلمدەر ءتۇسىرۋ، ماتەريال ازىرلەۋ جانە تاعى باسقالارى»، - دەيدى ۆان تسزيان شەن.

سونداي- اق، ول Kazinform ۇجىمىن تۋعان كۇنىمەن قۇتتىقتادى.

«بيىل Kazinform اقپارات اگەنتتىگىنە - 104 جىل. ءبىر عاسىردان استام تاريحى بار بايىرعى اگەنتتىكتى تۋعان كۇنىمەن قۇتتىقتايمىز. حالىقارالىق دەڭگەيدەن الەمدىك دەڭگەيگە كوتەرىلۋىنە تىلەكتەسپىز»، - دەدى ول.

ايتا كەتەيىك، CNS قىتاي مەملەكەتتىك اقپارات اگەنتتىگى قىتاي جانە اعىلشىن تىلىندە اقپارات تاراتادى. 30 مەملەكەتتە مەنشىكتى تىلشىلەرى بار. بۇدان بولەك، قىتايدىڭ ءاربىر پروۆيتسياسىندا فيليالى جۇمىس ىستەيدى.

اۆتور

الما مۇقانوۆا