ءبىر ايعا كوشىپ بارۋعا بولاتىن ارزان ەلدەر

استانا. KAZINFORM - ساپالى ءومىر ءسۇرۋ مىندەتتى تۇردە قىمبات بولماۋى مۇمكىن. ءبىر ايعا شەتەلگە كوشىپ، تابيعات اياسىندا ءومىر ءسۇرۋدى، جاڭا مادەنيەتپەن تانىسۋدى جانە شىعىندى ازايتۋدى قالايتىندار ءۇشىن الەمدە ارزان ءارى جايلى ەلدەر از ەمەس.

وسى رەتتە El.kz ينتەرنەت پورتالىنىڭ ءتىلشىسى تايلاند، ۆەتنام، مالايزيا، يندونەزيا جانە گرۋزيا سياقتى بيۋجەتتىك، قاۋىپسىز جانە تۇرمىسقا قولايلى ەلدەرگە شولۋ جاسادى.

تايلاند (چيانگ ماي) - ارزان ءارى ءتيىمدى

تايلاندتا ەكى-ءۇش ادامنان تۇراتىن وتباسىنىڭ ورتاشا ايلىق ءومىر ءسۇرۋ بيۋجەتى شامامەن 600 ا ق ش دوللاردى قۇرايدى.

بۇل مەملەكەتتە ءومىر سۇرۋگە كەتەتىن نەگىزگى شىعىن - تۇرعىن ءۇي جالداۋ. ازىق-تۇلىك باعاسى ت م د مەن ەۋروپا ەلدەرىنە قاراعاندا الدەقايدا تومەن. سونىمەن قاتار، تاي حالقى مەن تۋريستەردىڭ كۇندەلىكتى راتسيونىندا جاڭا پىسكەن جەمىس-جيدەكتەر كوپ، ونى وتە ارزان باعاعا ساتىپ الۋعا بولادى. قوعامدىق تاماقتانۋ ورىندارىندا تاڭعى جانە تۇسكى اس باعالارى قولجەتىمدى، سوندىقتان مەيرامحانالاردا تاماقتانۋ دا ارزانعا تۇسەدى.

ەلدە قونىس اۋدارۋشىلار تۇراتىن ايماقتار كوپ، ولاردىڭ باسىم بولىگى بانگكوكتا شوعىرلانعان. الايدا، ۇلكەن قالانىڭ قاربالاس ءومىرى ۇنامايتىندار ءۇشىن سولتۇستىكتەگى تىنىش ءارى ارزان قالا - چيانگمايعا نازار اۋدارۋعا بولادى. چيانگمايدا ءبىر ايعا تۇرعىن ءۇي جالداپ تۇرۋ قۇنى 150-200 مىڭ تەڭگەنى قۇرايدى.

تايلاندتا وتە از اقشاعا دا ءومىر سۇرۋگە بولادى، ءبىراق بۇل ەلدىڭ بارلىق ارتىقشىلىقتارىن فريلانسەرلەر نەمەسە قاشىقتان جۇمىس ىستەيتىن شەتەلدىك كومپانيا قىزمەتكەرلەرى تولىقتاي پايدالانا الادى.

ۆەتنام (دانانگ)

ۆەتنام - ءومىر سۇرۋگە ەڭ ارزان ەلدەردىڭ ءبىرى. مۇندا تۇرعىن ءۇي جالداۋ قۇنى وتە تومەن. اۋىلدىق ەلدى مەكەندەردە شاعىن ءۇيدى ايىنا نەبارى 50-60 ا ق ش دوللارىنا جالداۋعا بولادى.

ۆەتنامنىڭ ارزان جانە قاۋىپسىز قالاسىنىڭ ءبىرى دانانگ - ۆەتنامنىڭ ورتالىعىندا ورنالاسقان، جاعاجايلارىمەن، ينفراقۇرىلىمىمەن جانە قولجەتىمدى ءومىر ءسۇرۋ دەڭگەيىمەن تانىمال قالا مۇندا ءبىر ايعا تۇرعىن ءۇيدى جالداپ تۇرۋ قۇنى 80-120 مىڭ تەڭگەنى قۇرايدى. بارلىق تۇرعىن ۇيلەر جيھازبەن جانە تۇرمىستىق تەحنيكامەن تولىق جابدىقتالعان.

ۆەتنامدا ازىق-تۇلىك باعاسى دا وتە ارزان - ءبىر ادامعا ايىنا 130-300 دوللار ارالىعىندا تاماققا كەتەدى. كوپتەگەن شەتەلدىكتەر ۆەتنام ۇلتتىق تاعامدارىنا ساقتىقپەن قارايتىندىقتان، جەرگىلىكتى قوعامدىق تاماقتانۋ ورىندارى ەۋروپالىق تاعامداردى دا مازىرگە ەنگىزگەن، بۇل شەتەلدىكتەر ءۇشىن ىڭعايلى ءارى ءتيىمدى.

مالايزيا (كۋالا لۋمپۋر)

مالايزيا، اسىرەسە استاناسى - كۋالا لۋمپۋر، ءومىر سۇرۋگە ىڭعايلى، زاماناۋي ءارى ارزان قالالاردىڭ ءبىرى. بۇل قالا ازيانىڭ قارقىندى دامىپ جاتقان مەگاپوليسى، شەتەلدىكتەرگە بەيىمدەلگەن جانە ءومىر ءسۇرۋ دەڭگەيى جوعارى، ال باعالار سالىستىرمالى تۇردە قولجەتىمدى.

بۇل ەلدە ءبىر ايعا تۇرعىن ءۇيدى جالداپ تۇرۋ قۇنى 180-220 مىڭ تەڭگەنى قۇرايدى.

يندونەزيا (بالي)

ەكى-ءۇش ادامنان تۇراتىن وتباسى ءۇشىن ءومىر ءسۇرۋدىڭ ورتاشا ايلىق بيۋجەتى 1500-2500 ا ق ش دوللارى ارالىعىندا.

بالي - تايلاندتان كەيىنگى «جەردەگى جۇماقتىڭ» ەڭ تانىمال ورىندارىنىڭ ءبىرى بولعانىمەن، ونى الەمدەگى ەڭ ارزان مەكەن دەپ ايتۋ قيىن. دەگەنمەن، كۇندەلىكتى تۇرمىسقا قاجەت شىعىندار بۇل ەلدە ايتارلىقتاي تومەن.

بالي ارالىنىڭ باستى ارتىقشىلىعى - جان تىنىشتىعى مەن جاقسى اتموسفەراسى. مۇندا قاربالاس از، رۋحاني تىنىشتىق كوپ.

باليدە ءبىر ايعا تۇرعىن ءۇيدى جالداپ تۇرۋ قۇنى 150-200 مىڭ تەڭگەنى قۇرايدى. تىنىش، باياۋ ءومىر سالتىن ۇناتاتىن ادامدارعا ىڭعايلى جانە نەگىزگى تۇرمىستىق شىعىندارىن جابا الاتىن تۇراقتى تابىسى بار ادامدار ءۇشىن عانا قولايلى.

گرۋزيا (باتۋمي)

ەكى-ءۇش ادامنان تۇراتىن وتباسى ءۇشىن ءومىر ءسۇرۋدىڭ ورتاشا ايلىق بيۋجەتى شامامەن 1300 ا ق ش دوللارى.

گرۋزيا الەمدەگى ەڭ ارزان ەلدەردىڭ قاتارىنا بەكەر جاتقىزىلمايدى. تبيليسيدە جاڭا 1 بولمەلى پاتەردى جالعا الۋدىڭ ورتاشا باعاسى 300 دوللاردان باستالادى. ال ەسكى ۇيلەردەگى پاتەرلەردى 150-200 دوللار شاماسىندا جالداۋعا بولادى - بۇل وتە قولجەتىمدى نۇسقالار.

باليدە ءبىر ايعا تۇرعىن ءۇيدى جالداپ تۇرۋ قۇنى 180-230 مىڭ تەڭگەنى قۇرايدى.

گرۋزيا - پوستكەڭەستىك ەلدەردىڭ ازاماتتارى ءۇشىن مەنتاليتەتى مەن مادەنيەتى ۇقساس، بەيىمدەلۋگە وڭاي مەملەكەت.

گرۋزيا ۇكىمەتى شەتەلدىك ازاماتتارعا ارنالعان ءتۇرلى ىقتيارحات باعدارلامالارىن ۇسىنادى. وسى سەبەپتى ەلدە تۇرۋعا، جۇمىس ىستەۋگە نەمەسە وقۋعا نيەتتى ادامدار ءۇشىن بۇل مەملەكەت قولايلى تاڭداۋ بولا الادى.