ءبىر اپتادا ەلوردادا كولىكتى ماس كۇيدە باسقارعان 25 جۇرگىزۋشى ۇستالدى

استانا. KAZINFORM - ءبىر اپتا ىشىندە ەلوردا اۋماعىندا ءۇش مىڭنان استام اكىمشىلىك قۇقىق بۇزۋشىلىق تىركەلدى. بۇل تۋرالى استانا قالالىق پوليتسيا دەپارتامەنتى جەرگىلىكتى پوليتسيا قىزمەتى باسقارماسىنىڭ باستىعى ەرجان ادىلبەكوۆ ايتتى.

- 2025 -جىلعى 18-21- اقپاندا استانا قالاسىنىڭ اۋماعىندا «قاۋىپسىز جول» رەسپۋبليكالىق جەدەل الدىن الۋ ءىس-شاراسى وتكىزىلدى. ءىس- شارا بارىسىندا جول قوزعالىسى ەرەجەلەرىنىڭ ورەسكەل بۇزىلۋىن انىقتاۋعا ەرەكشە نازار اۋدارىلدى، - دەدى ەرجان ادىلبەكوۆ استانا قالالىق كوممۋنيكاتسيالار قىزمەتىندە وتكەن بريفينگتە.

باسقارما باسشىسىنىڭ دەرەگىنشە، ءىس-شارا ناتيجەسىندە 3336 اكىمشىلىك قۇقىق بۇزۋشىلىق تىركەلدى. ونىڭ ىشىندە:

- قوعامدىق ورىنداردا ادامداردىڭ مازاسىن العان 58 تاكسي جۇرگىزۋشىسى؛

- ق ر اۋماعىندا بولۋ ەرەجەلەرىن بۇزعان 113 شەتەلدىك ازامات؛

- تىركەۋدەن وتپەگەن كولىك قۇرالىن باسقارعان 47 جۇرگىزۋشى؛

- جالعان مەملەكەتتىك تىركەۋ نومىرىمەن كولىك باسقارعان 1 جۇرگىزۋشى؛

- كولىك باسقارۋ كەزىندە تەلەفون نەمەسە راديوستانسيا پايدالانعان 183 جۇرگىزۋشى؛

- جولاۋشىلار مەن جۇكتەردى تاسىمالداۋ، قاۋىپسىزدىك بەلدىگىن پايدالانۋ ەرەجەلەرىن بۇزعان 484 جۇرگىزۋشى؛

- مانەۆر جاساۋ ەرەجەلەرىن بۇزعان 162 جۇرگىزۋشى؛

- قارسى جولاققا شىققان 61 جۇرگىزۋشى؛

- باعدارشامنىڭ تىيىم سالىنعان بەلگىسىنە وتكەن 129 جۇرگىزۋشى؛

- جاياۋ جۇرگىنشىلەرگە جول بەرمەگەن 108 جۇرگىزۋشى؛

- اپاتتىق جاعداي تۋعىزعان 111 جۇرگىزۋشى؛

- ماس كۇيىندە كولىك جۇرگىزگەن 25 جۇرگىزۋشى؛

- جۇرگىزۋ قۇقىعى جوق بولسا دا كولىك باسقارعان 55 ادام؛

- مەديتسينالىق كۋالاندىرۋدان باس تارتقان 2 جۇرگىزۋشى؛

- بەلگىلەنبەگەن جەردەن جولدى كەسىپ وتكەن 591 جاياۋ جۇرگىنشى.

- جول جوندەۋ، تەمىرجول وتكەلدەرىن جانە باسقا دا جول ينفراقۇرىلىمدارىن ۇستاۋ تالاپتارىن بۇزعانى ءۇشىن 23 ۇيىم، الدىن الا رەيستىك جانە مەديتسينالىق تەكسەرۋدەن وتپەگەن تاكسي كولىكتەرىن شىعارعانى ءۇشىن 10 تاكسي كومپانياسىنىڭ جاۋاپتى تۇلعالارى اكىمشىلىك جاۋاپكەرشىلىككە تارتىلدى، - دەدى ول.

اۆتور

مارلان جيەمباي