ءبىر ادام جان ساقتاۋ بولىمىندە - دارىگەرلەر قارقارالىداعى ورتتەن زارداپ شەككەندەردىڭ جاعدايىن ايتتى

قاراعاندى. KAZINFORM - قاراعاندى وبلىسىنىڭ دەنساۋلىق ساقتاۋ باسقارماسى قارقارالى اۋدانىنداعى دالا ءورتى كەزىندە زارداپ شەككەندەردىڭ جاعدايى تۋرالى حابارلادى. دارىگەرلەردىڭ ايتۋىنشا، ءبىر ادام رەانيماتسيادا، ءتورت ادامنىڭ جاعدايى تۇراقتى، دەپ حابارلايدى Kazinform اگەنتتىگىنىڭ ءتىلشىسى.

«قارقارالى اۋدانىنىڭ شەپتىكول اۋىلىندا دالا ءورتىن ءسوندىرۋ بارىسىندا 5 ادام زارداپ شەكتى. ءتورت پاتسيەنتتىڭ جاعدايى تۇراقتى دەپ باعالانادى. بەسىنشى ناۋقاستىڭ جاعدايى اۋىر (كۇيىك 5 دەنەسىن شالعان) جانە ول رەانيماتسيادا. بارلىق زارداپ شەككەندەرگە ستاتسيوناردا قاجەتتى مەديتسينالىق كومەك كورسەتىلۋدە»، - دەپ مالىمدەدى ح. ج. ماقاجانوۆ اتىنداعى كوپسالالى اۋرۋحانانىڭ تراۆماتولوگيا ورتالىعىنىڭ باسشىسى بەرىك تولەۋبايەۆ.

انىقتالعانداي، جان ساقتاۋ بولىمىندە جاتقان ناۋقاس جەرگىلىكتى تۇرعىن جانە ەرىكتى ءورت ءسوندىرۋ ءبولىمىنىڭ مۇشەسى بولىپ شىقتى.

«قۇرمەتتى تۇرعىندار، ساعات 11.00-دەگى جاعداي بويىنشا باياندايمىن. ورتپەن كۇرەسۋ ءۇشىن 562 ادام جانە 81 بىرلىك تەحنيكا جۇمىلدىرىلدى. قۇتقارۋشىلار تاماقپەن، سۋمەن، تەحنيكاعا قاجەتتى ج ج م تولىق كولەمدە قامتاماسىز ەتىلگەن. سونداي-اق، اۋداننىڭ ازىق-تۇلىك دۇكەندەرىندە قاجەتتىنىڭ ءبارى بار - ازىق-تۇلىك، سۋ جانە ت. ب. ءورت 35 مىڭ گەكتار اۋماققا تارادى، ءبىراق ەڭ باستىسى ەلدى مەكەندەردەن الشاق جەرلەردە»، - دەدى قارقارالى اۋدانىنىڭ اكىمى ءادىلجان ارعىنوۆ.

سونداي-اق، ول مال قىرىلۋى تۋرالى اقپارات تۇسپەگەنىن جانە ولار بارلىق فەرمەرلەرمەن ۇنەمى بايلانىستا ەكەنىن اتاپ ءوتتى.

«بارلىق تۇرعىنداردان جالعان اقپارات تاراتپاۋىن سۇرايمىن. اۋدان اكىمدىگىندە 87214631366 جەدەل جەلىسى جۇمىس ىستەيدى، بارلىق سۇراقتاردى وسى تەلەفون ارقىلى ناقتىلاۋعا بولادى. قۇتقارۋشىلار تاۋلىك بويى جۇمىس ىستەپ جاتىر، ءورتتى جويۋ بويىنشا بارلىق شارالار قابىلداۋدا»، - دەدى اۋدان اكىمى.

ەستەرىڭىزگە سالا كەتەيىك، 6-قازاندا قارقارالى اۋدانىندا دالا ءورتى باستالدى. ءورتتى ءسوندىرۋ كەزىندە 24 - ءو س ب ازاماتتىق قورعاۋ سەرجانتى حالي حايرات قازا تاپتى.

وسىعان دەيىن باياناۋىلدا ءورت شالعان جەرلەردىڭ اۋماعى 10 مىڭ گەكتارعا جەتكەننىن جازدىق.

ايتا كەتەيىك، توتەنشە جاعدايلار مينيسترلىگىنىڭ باسپا ءسوز قىزمەتى قاراعاندى وبلىسىندا تۇتانعان دالا ورتىنە بايلانىستى تىڭ مالىمەتتەردى جاريالادى.

ال قارقارالى اۋدانىنىڭ اكىمى ءادىلجان ارعىنوۆ قازىر الەۋمەتتىك جەلىلەردە ءتۇرلى كومەك ۇيىمداستىرىپ جاتقاندار تۋرالى ەسكەرتتى.

اۆتور

ايزادا اگيلبايەۆا