ءازىل-شىنى ارالاس

استانا. قازاقپارات - سىزدەردىڭ نازارلارىڭىزعا حالىق اراسىندا ايتىلعان ءازىل-شىنى ارالاس اڭگىمەلەر مەن كەي قالجىڭقويلاردىڭ وقىستان، دەر كەزىندە ءدوپ باسىپ ايتقان سوزدەرىن ۇسىنامىز.

ۇلتاراقوۆ پەن بايپاقوۆ

بەلگىلى پارتيا جانە كەڭەس قىزمەتكەرى قازتاي ۇلتاراقوۆ وبلىستىق پارتيا كوميتەتىنىڭ اۋىل شارۋاشىلىعى ءبولىمىنىڭ مەڭگەرۋشىسى بولىپ جۇرگەن كەزدە ءبىر جىگىتتى قىزمەتكە الادى. ونىڭ فاميلياسى بايپاقوۆ ەكەن.

سوندا ۇلتاراقوۆ:

- وسى قازاق تا نەشە ءتۇرلى ات قويا بەرەدى ەكەن-اۋ! - دەپ تاڭىرقاسا كەرەك. سوندا ارىپتەسى مىرزاحمەت مولداحمەتوۆ:

- قازەكە-اۋ، نەسىنە تاڭىرقايسىز؟ بايپاق ۇلتاراقتان گورى تاۋىرلەۋ ەمەس پە؟ - دەگەن ەكەن.

«قىرىلىپ قالىپتى عوي» ...

ىلگەرىدە كەڭەس ۇكىمەتىنىڭ كەزىندە اسپاندا قۇداي جەردە م ا ي (جول ساقشىسى) قۇداي بولىپ تۇرعان كەز. ول ۋاقىتتا قازىرگىدەي اعىلعان ماشينا كوپ ەمەس. اركىم قولعا تۇسكەنىن پايدالانادى.

اۋىلدا ءبىر كىسى قايتىس بولىپ، كور قازۋعا 5-6 جىگىت ماشيناسىمەن قورىمعا كەلە جاتسا كەرەك. تابىلعانى سول بولدى ما، كولىكتەرى جۇكتى ءوزى اۋداراتىن (ساموسۆال) ەكەن. جۇيتكىتىپ كەلە جاتقان جۇرگىزۋشى سونادايدان جولدا تۇرعان م ا ي قىزمەتكەرىن كورەدى دە ماشينانى توقتاتىپ، ۇستىندەگىلەرگە «جاتىڭدار» دەپ بەلگى بەرەدى.

بۇرىلىپ كەتۋدىڭ ىڭعايى كەلمەي، امالسىز م ا ي-دىڭ قاسىنا توقتايدى. سالىمجان شوفەردىڭ قۇجاتتارىن تەكسەرىپ، جاعدايعا قانىققاننان كەيىن ماشينانىڭ قورابىنا اسىلىپ قاراسا 5-6 جىگىت بىرشىپ تەرلەپ، تىرپ ەتپەي جاتىر دەيدى. سوندا يمان ءجۇزدى سالىمجان جۇرگىزۋشىگە:

- ويباي، ءبارى قىرىلىپ قالىپتى عوي. تەز اپارىپ مولاعا كومە عوي، -دەپتى.

ارىستان مەن جولبارىس

جۋرناليست ارىستان رۇستەموۆ «جەتىسۋ» گازەتىندە قىزمەت ەتىپ جۇرگەن كەزدە، ۋنيۆەرسيتەتتە وقيتىن بولاشاق جۋرناليست جولبارىس ابىشەۆ ەكەۋىن ءبىر جىگىت رەداكسيا بولمەسىندە تانىستىرادى. ۇستەلدە وتىرعان رۇستەموۆ ورنىنان تۇرىپ:

- ارىستان، - دەپ قولىن ءبىرىنشى ۇسىنادى. ال جاس جىگىت ابىشەۆ

- جولبارىس، - دەپ جىمىڭ ەتە قالادى. مىنەزى سالماقتى، سوزگە ساراڭ ارىستان رۇستەموۆ ونىڭ بەتىنە ءبىراز ۋاقىت قاراپ تۇرىپ:

- بالا، مۇنىڭدى قوي! - دەگەن ەكەن.