عاسىردىڭ تاڭداۋلى اڭگىمەلەرى: شەشە
استانا. قازاقپارات - كەشقۇرىم تارتا جولىم ءتۇسىپ دوسىمنىڭ ۇيىنە باردىم. ەكەۋمىز اڭگىمەنىڭ قىزىعىندا وتىرعاندا، ەسىك اشىلىپ كەتتى دە، ونىڭ كىشى ۇلى ەسىكتەن جىلاي كىرىپ: «شەشە، شەشە...» دەپ ايعايلاي باستادى.
«شەشەڭ ۇيدە جوق، جۇمىسقا كەتتى. ساعان نە بولدى؟ جىعىلىپ قالدىڭ با؟ ءوزىڭ ءسۇرىنىپ كەتكەن بولارسىڭ؟ جىگىت ادام بۇعان جىلاي ما ەكەن؟ - دەپ سويلەي ءجۇرىپ، بالاسىن ۋاتقان بولدى، - بار، ەندى ويناي عوي!» دەدى.
بالاسى شىعىپ كەتكەن سوڭ، دوسىم قاتتى كەيىگەن بەينەدە: «قاشان كورسەڭ شەشە، شەشە دەپ جۇرگەنى! سەن بىلەسىڭ بە، مەن كەيدە، شىنىمەن-اق قورىنىپ قالامىن، ول مەنى شەشەسىن جاقسى كورگەن سياقتى جاقسى كورمەيتىندەي سەزىنەدى، ءتىپتى، وسى اكە بولعان بىزدەر، بالانىڭ ويىندا تەك ولاردى ۇرىپ-سوعۋعا عانا جارالعانداي كورىنەمىز عوي دەيمىن. شىندىعىندا، مەن وعان ويىنشىق ساتىپ اپەرەمىن، ەركەلەتەمىن عوي. ال، ول تاعى دا مەنى شەشەسى عۇرلى كورمەيدى. ءوزىڭ ايتشى، بۇل نە ءۇشىن؟»
مەن يىعىمدى قيقاڭ ەتكىزدىم دە: «ەگەر ۇيدە شەشەسى جوق بولسا، ۇلىڭ ءسوز جوق اكەلەپ جۇگىرەر ەدى» دەدىم مەن.
«سولاي، - دەدى دوسىم مەنى قوستاي سويلەپ، - ءوزىم جاسىمنان شەشە كورمەي ءوستىم. سوندىقتان، مەنىڭ ەسىمدە تەك اكە دەگەن اتاۋ بار».
مەن دوسىممەن قوشتاسىپ، كەتۋگە جينالىپ جاتقاندا، ايەلى جۇمىستان قايتىپ كەلدى. بالا شەشەسىنە بارىپ ساپ ەتە قالىپ، جىبەرەر ەمەس. ول شەشەسىنە جاڭاعى بولعان ىستەردى، ءوزىنىڭ قالايدان-قالاي جىعىلىپ قالعانىن، قالاي اۋىرعانىن، ءوزىنىڭ قايتىپ جىلاعانىن ءبىر-بىرلەپ ايتىپ شىقتى. شەشەسى بالاسىنىڭ باسىنان سيپاپ، جىعىلعاندا جەر ءسۇرىپ كەتكەن قولىن ۇرلەپ-ۇرلەپ قويدى جانە ونى ءسۇيدى. دوسىم قاباعىن تۇيە ولارعا قاراپ تۇردى دا: «قاراشى، شەشەلى-بالالى ەكەۋىنىڭ جايى جاراسا قالدى...» دەپ قومپىلدادى.
ءبىراز كۇننەن كەيىن دوسىم جۇمىس ۇستىندە ساتىدان قۇلاپ جارالاندى. ءبىز ونى كوتەرىپ، دەمالىس بولمەسىنە اكەلىپ، جەدەل جاردەم كولىگىن شاقىردىق. دوسىم سول ساتتەردە اۋىز جاپپاي «شەشە، شەشە!» دەپ زارلاپ جاتتى.
ب.كراۆچەنكو(رەسەي)
massaget