بۇل تۋرالى ورتالىق سايلاۋ كوميسسياسىنىڭ مۇشەسى اسەل ءجانابىلوۆا ءتۇسىندىردى.
ونىڭ ايتۋىنشا، الداعى ءماسليحات سايلاۋى ارالاس سايلاۋ جۇيەسى بويىنشا وتەدى، ياعني، سايلاۋعا ساياسي پارتيالار دا، ءبىرمانداتتىق سايلاۋ وكرۋگتەرى بويىنشا ۇسىنىلعان كانديداتتار دا قاتىسا الادى. ازاماتتار ءماسليحات دەپۋتاتتىعىنا ءوزىن-ءوزى ۇسىنۋ تارتىبىمەن دە كانديدات بولا الادى.
«قازاقستان رەسپۋبليكاسىنداعى سايلاۋ تۋرالى» كونستيتۋتسيالىق زاڭنىڭ 104-بابىنا سايكەس، پارتيالىق ءتىزىم ۇسىنعان ساياسي پارتيالار تىزىمگە ەنگىزىلگەن ءاربىر كانديدات ءۇشىن بەلگىلەنگەن ەڭ تومەنگى جالاقىنىڭ بەس ەسەلەنگەن مولشەرىندە سايلاۋ جارناسىن تولەيدى. قازىرگى ۋاقىتتا بۇل سوما 425 مىڭ تەڭگەنى قۇرايدى.
ال ءوزىن-ءوزى ۇسىنعان ازامات سايلاۋ زاڭناماسىنىڭ تالاپتارىنا سايكەستىگى تەكسەرىلگەننەن كەيىن، كانديدات رەتىندە تىركەلگەنگە دەيىن ءدال وسىنداي مولشەردە جارنا ەنگىزۋگە مىندەتتى.
سايلاۋ جارناسى قانداي جاعدايدا قايتارىلادى؟
و س ك وكىلىنىڭ تۇسىندىرۋىنشە، جارنانى قايتارۋ ءتارتىبى كانديداتتىڭ نەمەسە پارتيانىڭ سايلاۋ ناتيجەسىنە بايلانىستى.
ساياسي پارتيا سايلاۋعا قاتىسقان سايلاۋشىلار داۋىسىنىڭ كەمىندە 5 پايىزىن العان جاعدايدا جارناسىن قايتارىپ الادى. سونداي-اق پارتيالىق تىزىمدەگى جالعىز كانديدات قايتىس بولعان جاعدايدا دا جارنا قايتارىلادى.
ال ءوزىن-ءوزى ۇسىنعان كانديدات ءماسليحات دەپۋتاتى بولىپ سايلانسا نەمەسە داۋىس بەرۋگە قاتىسقان سايلاۋشىلار داۋىسىنىڭ كەمىندە 5 پايىزىن السا، ەنگىزگەن جارناسى وزىنە قايتارىلادى. كانديدات قايتىس بولعان جاعدايدا دا جارنا قايتارىلادى.
قالعان جاعدايلاردا سايلاۋ جارناسى قايتارىلمايدى جانە رەسپۋبليكالىق بيۋجەت كىرىسىنە اۋدارىلادى.
قانداي پارتيالار جارنانى تولىق تولەمەيدى؟
زاڭنامادا الدىڭعى سايلاۋدىڭ ناتيجەسىنە قاراي ساياسي پارتيالارعا جەڭىلدىكتەر قاراستىرىلعان. ءتيىستى سايلاۋ وكرۋگىندە وتكەن ءماسليحات دەپۋتاتتارىنىڭ الدىڭعى سايلاۋىندا سايلاۋشىلار داۋىسىنىڭ كەمىندە 5 پايىزىن العان پارتيالار جارنا تولەۋدەن بوساتىلادى.
ال 3 پايىزدان 5 پايىزعا دەيىن داۋىس جيناعان پارتيالار - بەلگىلەنگەن جارنانىڭ 50 پايىزىن، ال 1 پايىزدان 3 پايىزعا دەيىن داۋىس العان پارتيالار - ونىڭ 70 پايىزىن تولەيدى.
ەسكە سالا كەتسەك، 29-قاراشادا قازاقستاندا كەزەكتەن تىس ءماسليحات سايلاۋى وتەدى.
بۇعان دەيىن ورتالىق سايلاۋ كوميسسياسى كانديداتتاردىڭ قاشان تىركەلىپ، ۇگىت-ناسيحات جۇرگىزە الاتىنىن جاريالاعان ەدى.