دەپۋتاتتىڭ ايتۋىنشا، قابىلدانعان شارالارعا قاراماستان، قازاقستاندا تۇرمىستاعى زورلىق-زومبىلىق قۇرباندارىنىڭ سانى جوعارى كۇيىندە قالىپ وتىر. ونىڭ ۇستىنە، قورعاۋ تەتىكتەرى تەك وقيعا ورىن العاننان كەيىن عانا ىسكە قوسىلادى، ياعني ءتيىمدى الدىن الۋ شاراسى بولا الماي تۇر.
- زورلىق-زومبىلىق نەمەسە قۋدالاۋ بولعان ساتتە جابىرلەنۋشىدە قۇتىلىپ كەتۋى ءۇشىن نەبارى العاشقى بىرنەشە مينۋت قانا بولادى. ەسەڭگىرەگەن كۇيدە، قولىندا تەلەفونى نەمەسە اقشاسى جوق ادام رەسمي ارىز جازۋ ءۇشىن الىستاعى پوليتسيا بولىمشەسىنە جۇگىرىپ بارا المايدى. ەگەر دەرەۋ باس ساۋعالايتىن جەر بولماسا، جابىرلەنۋشى تىعىرىققا تىرەلەدى، - دەدى لاريسا لي قۇرىلتايدىڭ جالپى وتىرىسىندا جاريالاعان دەپۋتاتتىق ساۋالىندا.
وسى ورايدا دەپۋتات PANA دەپ اتالاتىن قوعامدىق باستامانى ۇسىندى. جوبا اياسىندا «قاۋىپسىز ورتا» جەلىسى قۇرىلماق. بۇل - جاقىن جەردە ورنالاسقان، قاۋىپسىز «سەنىم نۇكتەلەرىنىڭ» جەلىسى، ياعني شاعىن دۇكەندەر، ءدارىحانالار جانە مۇلىك يەلەرى بىرلەستىگى (م ي ب) وزدەرىن قاۋىپسىز نىسان رەتىندە ۇسىنا الادى. سونىمەن قاتار، اتالعان نىساندار جوباعا قاتىسۋعا دايىن ەكەندىكتەرىن راستاپ وتىر.
- ايەلدەر نەمەسە بالالار قازىرگى تۇرعان جەرىنەن 60 سەكۋندتىق قاشىقتىقتا ورنالاسقان دۇكەندەردە نەمەسە ءدارىحانالاردىڭ ەسىگىندە «PANA» گەولوكاتسيالىق بەلگىسى بار نىساندى بايقاسا، ىشكە كىرىپ پانالاي الادى. «ءۇش قادام» حاتتاماسىنا سايكەس، قىزمەتكەرلەر ولاردى قاۋىپسىز ىشكى بولمەگە ورنالاستىرىپ، قاۋىپتى ادامنان وقشاۋلايدى، سونىمەن قاتار العاشقى كومەك كورسەتىپ، شۇعىل تۇردە ءتيىستى ۆەدومستۆولارعا حابارلاسادى. بۇل جوبا مەملەكەتتىك بيۋدجەتتەن ءبىر تيىن دا جۇمساماي-اق، ينفراقۇرىلىم تاپشىلىعى ماسەلەسىن شەشۋگە باعىتتالعان. بۇل ءوز كەزەگىندە قۇرىلىسىنا نەمەسە كۇتىپ ۇستاۋىنا مەملەكەت تاراپىنان ەشقانداي شىعىن تالاپ ەتىلمەيتىن، پايدالانۋعا دايىن ءارى تەگىن جەلى، - دەدى دەپۋتات.
لاريسا ليدىڭ سوزىنە قاراعاندا، PANA جوباسىن پروكۋراتۋرانى، ىشكى ىستەر مينيسترلىگىن، «جانۇيا» وتباسىن قولداۋ ورتالىعىن جانە داعدارىس ورتالىقتارىن بىرىكتىرەتىن FSM Social پلاتفورماسىمەن دە ىقپالداستىرۋ قاجەت بولادى.
دەپۋتات بۇگىندە استانا، كوكشەتاۋ جانە تەمىرتاۋ قالالارى بۇل جوبانى پيلوتتىق تارتىپتە ىسكە قوسۋعا دايىن ەكەنىن جەتكىزدى.