ءدارى ساتىپ العاندا نەنى تەكسەرۋ كەرەك

دەنساۋلىق ساقتاۋ مينيسترلىگى ءدارى-دارمەك ساتىپ الار الدىندا بىرنەشە ماڭىزدى جايتقا نازار اۋدارۋدى ۇسىندى.

ەڭ اۋەلى، پرەپاراتتىڭ قازاقستاندا رەسمي تىركەلگەنىن تەكسەرۋ قاجەت. سونىمەن قاتار قاپتاماسى ءبۇتىن، جارامدىلىق مەرزىمى وتپەگەن جانە ءدارى بەلگىلەنگەن ساقتاۋ تالاپتارىنا ساي ساقتالعان بولۋعا ءتيىس.

قاپتامادا دارىلىك زاتتىڭ اتاۋى، دوزاسى، دارىلىك ءتۇرى جانە ءتيىستى تاڭبالانۋى كورسەتىلۋى كەرەك. ال مەديتسينالىق قولدانۋ جونىندەگى نۇسقاۋلىق قازاق جانە ورىس تىلدەرىندە قولجەتىمدى بولۋعا ءتيىس.

ءدارىنىڭ ءتۇپنۇسقالىعىن قالاي تەكسەرۋگە بولادى؟

پرەپاراتتىڭ قازاقستاندا تىركەلگەنىن مەملەكەتتىك دارىلىك زاتتار تىزىلىمىنەن - register.ndda.kz ارقىلى تەكسەرۋگە بولادى.

ءال دارىنىڭ ءتۇپنۇسقالىعىن جانە تاڭبالاۋ جۇيەسىندەگى مارتەبەسىن DariKz جانە Naqty Onim موبيلدى قوسىمشالارى ارقىلى قوسىمشا تەكسەرۋگە مۇمكىندىك بار.

مينيسترلىك ءدارى-دارمەكتى تەك ونى ساتۋعا زاڭدى قۇقىعى بار ءدارىحانالاردان جانە ءتيىستى ساۋدا ورىندارىنان ساتىپ الۋعا ۇندەدى. الەۋمەتتىك جەلىلەردەگى پاراقشالاردان، حابارلاندىرۋلاردان نەمەسە بەلگىسىز ينتەرنەت-سايتتاردان ءدارى ساتىپ العاندا اسا ساق بولعان ءجون.

ەسكە سالايىق، بۇعان دەيىن وتاندىق ءدارى-دارمەك ءوندىرىسى 37 پايىزعا ارتقانىن جازعانبىز.