ءانىڭ تىڭدارمان جۇرەگىنە جەتسە، ودان اسقان باقىت جوق - جاسكەلەڭ عايساعاليەۆ

ورال. KAZINFORM - مادەنيەت جانە ونەر قىزمەتكەرلەرى كۇنىنە وراي ع. قۇرمانعاليەۆ اتىنداعى باتىس قازاقستان وبلىستىق فيلارمونياسىنىڭ سوليسى، كومپوزيتور جاسكەلەڭ عايساعاليەۆكە «قازاقستاننىڭ ەڭبەك سىڭىرگەن قايراتكەرى» قۇرمەتتى اتاعى بەرىلدى. وسىعان وراي Kazinform ءتىلشىسى ونەر قايراتكەرىنە بىرنەشە ساۋال قويعان ەدى.

- جاسكەلەڭ ورىنباسار ۇلى، ماراپات قۇتتى بولسىن! بۇل وسى سالاداعى ۇزاق جىلعى ەڭبەگىڭىزگە بەرىلگەن جوعارى باعا شىعار؟

- ارينە، سولاي دەپ ويلايمىن. پرەزيدەنت جارلىعىمەن مادەنيەت جانە ونەر قىزمەتكەرلەرىنىڭ كۇنى 2013 -جىلدان بەرى اتالىپ ءوتىلىپ كەلەدى. ازدى-كوپتى ەڭبەگىمنىڭ ەلەنگەنىنە قۋانىشتىمىن. بۇل - ءوزىم عانا ەمەس، جالپى ۇجىمنىڭ باعى جانعان كۇن دەپ ەسەپتەيمىن. جالپى، وسى سالادا قىزمەت اتقارعانىما بيىل قىرىق جىل تولادى ەكەن. بۇل از ۋاقىت ەمەس.

قازىرگى سىرىم اۋدانى جوسالى اۋىلىندا تۋىپ-ءوستىم. جاستايىمنان ءان مەن مۋزىكاعا جاقىن بولدىم. اكەم ورىنباسار ءانشى ەدى. مەنىڭ ونەر جولىنا تۇسۋىمە ول دا اسەر ەتكەن بولار. اۋىلدا جۇرگەندە-اق جاستاردىڭ باسىن قوسىپ، «نازقوڭىر» انسامبلىن قۇردىم. انسامبل تەك وسى وڭىرمەن شەكتەلمەي، 1991 -جىلى «تاماشا» ويىن-ساۋىق وتاۋىنا قاتىستى.

كەيىن ورال قالاسىنا اۋىسىپ، شىعارماشىلىق قارىم-قابىلەتىم اشىلا ءتۇستى. وسىعان دەيىن «ەرەن ەڭبەگى ءۇشىن» مەدالىنە قوسا «مادەنيەت سالاسىنىڭ ۇزدىگى» توسبەلگىسىمەن ماراپاتتالدىم.

وسى كەزەڭدە قانشاما اسۋدان وتتىك، قيىندىقتاردى جەڭە بىلدىك. وسى ماراپات سونىڭ وتەۋى شىعار، قۋانىشتى كۇندەرىمنىڭ ءبىرى بولىپ ەستە قالاتىنى انىق.

- اق جايىق جۇرتشىلىعى ءوزىڭىزدى ءانشى عانا ەمەس، كومپوزيتور رەتىندە جاقسى بىلەدى. شىعارماشىلىق قىرىڭا دا توقتالىپ وتسەڭىز ؟

- ءان شىعارىپ كەلە جاتقانىما وتىز جىلعا جۋىقتاعان ەكەن. شىعارماشىلىقپەن اينالىسۋ وڭاي ەمەس. دەگەنمەن تۋىندىلارىڭ جارىق كورىپ، تىڭدارماندار مەن كورەرمەندەر جۇرەگىنە جەتىپ جاتسا، كومپوزيتور ءۇشىن ودان اسقان باقىت جوق. كەيدە ءوزىڭ ورىندايسىڭ، كەيدە ءانشى ارىپتەستەرىم شىرقاپ جاتادى. قازىرگى تاڭدا الپىسقا جۋىق ءانىم ورىندالىپ ءجۇر. ال كىتابىما جۇزدەن استام تۋىندىم ەنگىزىلدى.

- قۇرمەتتى اتاق جاڭا تابىستارعا ىنتالاندىراتىن بولار؟

- وعان ەندى ءسوز جوق. شىعارماشىلىقتى دامىتۋعا، تىڭ ىزدەنىستەرگە جول اشادى دەپ ويلايمىن. ءوزىم بولاشاقتان ۇلكەن ءۇمىت كۇتەمىن.

- عاريفوللا قۇرمانعاليەۆ اتىنداعى فيلارمونياعا اكادەميالىق اتاق بەرىلمەكشى. بۇعان بايلانىستى نە ايتار ەدىڭىز؟

- ءيا، قۋانىشتىڭ ۇستىنە قۋانىش قوسىلدى. مەملەكەت باسشىسى كەشە ءبىزدىڭ فيلارمونيانى ساناۋلى ونەر مەكەمەلەرىنىڭ قاتارىندا اتاپ، اكادەميالىق اتاق بەرىلەتىنىن ايتتى. الداعى جىلى وتاۋ تىككەنىنە الپىس جىل تولاتىن قارا شاڭىراقتا قىزمەت ەتۋ - زور باقىت، ەكىنىڭ ءبىرىنىڭ پەشەنەسىنە جازىلماعان. بۇل - مەملەكەتتىڭ، ەلدىڭ بەرگەن باعاسى. سونىمەن قاتار اكادەميالىق اتاق الىپ جاتساق، بۇل قوسىمشا جاۋاپكەرشىلىك ۇستەيدى. بۇرىنعى تابىستارىمىز ءوز الدىنا، جاڭا تالاپتارعا ساي بولۋىمىز كەرەك. بۇل جولدا ايانبايتىنىمىز انىق.

- اڭگىمەڭىزگە راحمەت! ەڭبەگىڭىز جانا بەرسىن!

ەسكە سالا كەتەيىك، بۇدان بۇرىن پرەزيدەنت مادەنيەت سالاسىنداعى ءبىر توپ ازاماتتى مەملەكەتتىك ناگرادامەن ماراپاتتاعانىن جازعان ەدىك.

سونداي-اق باتىس قازاقستاندا مادەنيەت سالاسىنىڭ ۇزدىكتەرى ماراپاتتالدى.

اۆتور

عايساعالي سەيتاق