عاني بەيسەمبايەۆ وقۋشىنى جەزوكشەلىككە ماجبۇرلەۋ داۋىنا قاتىستى پىكىر ءبىلدىردى

استانا. KAZINFORM - وقۋ-اعارتۋ ءمينيسترى عاني بەيسەمبايەۆ قىزىلوردا وبلىسىندا كامەلەتكە تولماعان قىزدى جەزوكشەلىكپەن اينالىسۋعا ماجبۇرلەۋ فاكتىسىنە قاتىستى پىكىر ءبىلدىردى.

«بىرىنشىدەن بۇل ماسەلەنىڭ ءبارىن ءجىتى انىقتاۋ كەرەك. مەن وبلىس اكىمىمەن بۇل سۇراققا بايلانىستى تىعىز بايلانىستامىن. جانە ولارعا ءبىزدىڭ ۇستازدارعا قاتىستى جەدەل شەشىم قابىلداماۋدى سۇرادىم. ويتكەنى باس-اياعىن انىقتاپ الۋ كەرەك. قازىر ىشكى ىستەر ورگاندارى دا بۇل ماسەلەدە اسىعىستىق تانىتپاۋدى ايتىپ وتىر. مەن بۇل شەشىممەن كەلىسەمىن. سوندىقتان ءار ماسەلەنىڭ ارتىندا ادام تاعدىرى تۇرعاننان كەيىن شەشىم قابىلداۋدا اباي بولۋىمىز كەرەك»، - دەيدى وقۋ-اعارتۋ ءمينيسترى ەلورداداعى تامىز كونفەرەنسياسىندا.

ەسكە سالساق، قىزىلوردا قالاسىندا مەكتەپ وقۋشىلارى «سىنىپتاسىن سەكس-قۇلدىقتا ۇستادى» دەگەن كۇدىككە ءىلىندى. ءبىر توپ جاس ءوسپىرىم 16 جاستاعى قىزدى قيناپ ۇستاعانى، ەسىرتكى بەرىپ، جەزوكشەلىكپەن اينالىسۋعا ماجبۇرلەگەنى تۋرالى اقپارات تارادى. وقۋشى قىزدىڭ اتا-اناسى جاعدايدى قوعامدىق قورعا حابارلاعان. ال، وقۋشىنىڭ «سەكس-قۇلدىقتا جۇرگەنىن» ونىڭ دوسى انىقتاعان.

قىزىلوردا پوليتسياسى اتالعان دەرەك بويىنشا كۇدىكتىلەردى ۇستاپ، ۋاقىتشا ۇستاۋ يزولياتورىنا قامادى. كەيىن كۇدىككە ىلىنگەن مەكتەپ وقۋشىلارى ءۇيقاماققا اۋىستىرىلدى.

وقيعاعا بايلانىستى №7-مەكتەپ-ليتسەي ديرەكتورى، تاربيە ءىسى جونىندەگى ورىنباسارى، پسيحولوگى، الەۋمەتتىك پەداگوگى، سىنىپ جەتەكشىلەرى جۇمىستان بوساتىلدى.

اۆتور
ايجان سەرىكجان قىزى