ءالىمحان ۇلىنىڭ كەلەسى قارسىلاسى 18 نوكاۋتى بار چەمپيون بولادى

استانا. KAZINFORM – ورتا سالماقتا WBO جانە IBF چەمپيونى جانىبەك ءالىمحان ۇلى (17-0، 12 ك و) كەلەسى قارسىلاسىن تاڭدادى، دەپ حابارلايدى Vesti.kz.

ءۇش تيتۋل ءۇشىن ايقاس جانىبەكتىڭ سوزىنشە، ول ءوز تاڭداۋى تۋرالى مەنەدجەرىنە حابارلاپ قويىپتى. قازاق بوكسشى ورتا ديۆيزيوندا WBC تيتۋلىنا يە دومينيكانالىق كارلوس ادامەسپەن (24-1-1، 18 KO) ايقاسقىسى كەلەدى.

ماعان وسى ءۇشىنشى تيتۋل كەرەك! قازر مەنى باسقا ەشقانداي ايقاس قىزىقتىرمايدى، تەك بەلبەۋ الىپ كەلەتىن جەكپە-جەك قانا. كارلوس ادامەس، مەن مەنەدجەرىمە جۇدىرىقتاسقىم كەلەتىن جالعىز قارسىلاس سەن دەپ ايتتىم! ەندى سەنىڭ كەزەگىڭ. كومانداڭمەن سويلەس تە، جەكپە-جەك وتەتىندەي ەتەيىك - ەشقانداي سىلتاۋسىز، ۋاقىت سوزباي. جانكۇيەرلەرگە قالاعانىن بەرەيىك، - دەپ جازىپتى ءالىمحان ۇلى الەۋمەتتىك جەلىدە.

ابسوليۋتقا اپارار جول

ەسكە سالايىق، 5-ءساۋىر استانادا قازاقستاندىق چەمپيون فرانسيالىق اناۋەل نگاميسسەنگەمەن ايقاستا ەكى تيتۋلىن قورعادى. جانىبەك قارسىلاسىن بەسىنشى راۋندتا نوكاۋتقا ءتۇسىردى. وسىدان كەيىن ءالىمحان ۇلى الەمنىڭ ابسوليۋت چەمپيونى بولعىسى كەلەتىنىن مالىمدەدى.

بۇل ءۇشىن قازاقستاندىققا تاعى ەكى بەلبەۋ - ادامەستەگى WBC- دەن بولەك، كۋبالىق ەريسلاندي لاراداعى (31-3، 19 KO) WBA تيتۋلى دا قاجەت.