ءالىمحان ۇلى ادامەسپەن جەكپە- جەك وتكىزۋ ءۇشىن قۇجاتتارعا قول قويدى

استانا. قازاقپارات - IBF جانە WBO نۇسقالارى بويىنشا ورتا سالماقتاعى الەم چەمپيونى قازاقستاندىق جانىبەك ءالىمحان ۇلى (17-0، 12 KO) WBC نۇسقاسى بويىنشا چەمپيون كارلوس ادامەسپەن (24-1-1، 18 KO) جەكپە-جەك وتكىزۋگە تولىق دايىن ەكەنىن مالىمدەدى.

«قازاق ستيلى» ءوز تاراپىنان قاجەتتى قۇجاتتاردىڭ بارىنە قول قويعان، ەندى كەزەك دومينيكاندىق بوكسشىنىڭ كومانداسىندا. بۇل تۋرالى جانىبەكتىڭ ءوزى الەۋمەتتىك جەلىدەگى پاراقشاسىندا جازدى.

«ادامەس، ءبىز بارلىق قۇجاتقا قول قويدىق. سەنى عانا كۇتىپ وتىرمىز! قول قويۋدان نەگە قاشىپ ءجۇرسىڭ؟ قۇجاتتىڭ ءبارى سەنىڭ ۇستەلىڭدە تۇر عوي!» - دەپ جازدى ءالىمحان ۇلى.

ەكەۋارا جەكپە-جەكتى جانكۇيەرلەر دە اسىعا كۇتىپ جۇرگەنى راس. بۇعان دەيىن ادامەستىڭ ءوزى دە كەلىسسوزدەر ءجۇرىپ جاتقانىن ايتىپ ەدى.

«قازىر مەندە جانىبەكپەن بىرىكتىرۋشى جەكپە-جەك وتكىزۋ مۇمكىندىگى بار. ءبىز Top Rank-پەن كەلىسسوزدەر جۇرگىزىپ جاتىرمىز، بۇل ايقاستى ۇيىمداستىرۋدىڭ ەڭ ءتيىمدى جولدارىن ىزدەۋدەمىز. مەنىڭ قازىرگى باستى ماقساتىم وسى»، - دەدى ول.

ەستەرىڭىزدە بولسا، كارلوس ادامەس 2025-جىلدىڭ 22-اقپانىندا ەر-ريادتا بريتانيالىق حامزا شيرازبەن (21-0-1، 17 ك و) جەكپە-جەك وتكىزىپ، ايقاس تەڭ ناتيجەمەن اياقتالدى.

ال جانىبەك ءالىمحان ۇلى 2025-جىلدىڭ 5-ساۋىرىندە استانادا فرانسۋز اناۋەل نگاميسسەنگەنى (14-1، 9 ك و) بەسىنشى راۋندتا نوكاۋتپەن جەڭىپ، ءوز تيتۋلدارىن ءساتتى قورعادى.