عالىمدار ونكولوگيانى جەڭۋدىڭ جولىن تاپتى
استانا. KAZINFORM – ۇلى بريتانيانىڭ ۇلتتىق دەنساۋلىق ساقتاۋ قىزمەتىنىڭ جەتەكشى مامانى، پروفەسسور ستيۆەن پوۋيس الداعى 50 جىلدا قاتەرلى ىسىكتەن ەمدەلىپ، امان قالۋ كورسەتكىشى ءتورت ەسە ارتۋى مۇمكىن ەكەنىن مالىمدەدى.
بۇل تۋرالى Telegraph باسىلىمى جازدى.
پروفەسسور پوۋيستىڭ ايتۋىنشا، ونكولوگيانى ەمدەۋدە ايتارلىقتاي ىلگەرىلەۋگە بىرنەشە فاكتور ىقپال ەتەدى: وكپە وبىرىنا قارسى جاڭا ۆاكسينالار كلينيكالىق سىناقتاردا تيىمدىلىگىن كورسەتكەن جانە ىسىكتەردى جەكە ەرەكشەلىكتەرىنە قاراي ەمدەۋگە مۇمكىندىك بەرەتىن گەنەتيكالىق تەستىلەر ازىرلەنگەن.
قازىرگى تاڭدا ەمدەۋ ادىستەرى سونشالىقتى جىلدام دامىپ جاتىر، ەندى قاتەرلى ىسىك دياگنوزى ومىرمەن قوشتاسۋ ۇكىمى بولۋدان قالىپ كەلەدى. يممۋنوتەراپيا، دارىلىك تەراپيا جانە ەرتە دياگنوستيكا سالاسىنداعى سوڭعى جەتىستىكتەر قازىردىڭ وزىندە پاتسيەنتتەردىڭ ءومىرىن ۇزارتىپ، ونىڭ ساپاسىن ساقتاۋعا مۇمكىندىك بەرۋدە، - دەدى پروفەسسور ستيۆەن پوۋيس.
عالىمدار بۇل ۇدەرىستىڭ وكپە جانە ءسۇت بەزى قاتەرلى ىسىگى سياقتى كەڭ تارالعان ونكولوگيالىق اۋرۋلاردى ەمدەۋدە ەرەكشە ماڭىزعا يە بولاتىنىن اتاپ ءوتتى. ۆاكسينالار مەن گەنەتيكالىق تەستىلەۋ تەحنولوگيالارى ونكولوگيانى ءتيىمدى جانە جەكەلەي ەمدەۋگە جول اشپاق.
بۇعان دەيىن قاتەرلى ىسىك تۋدىرۋى مۇمكىن دارۋمەندەر تۋرالى جازعان ەدىك.