عالىمدار قارتايۋعا قارسى ءدارى جاساۋعا ءبىر تابان جاقىن قالدى

حالىقارالىق عالىمدار توبى قارتايۋ بەلگىلەرىن باياۋلاتىپ، ۇزاق ءارى ساپالى ءومىر سۇرۋگە مۇمكىندىك بەرەتىن گەندىك تەراپيانى ءساتتى سىناقتان وتكىزدى. بۇل جاڭالىقتى بارسەلونا اۆتونومدى ۋنيۆەرسيتەتىنىڭ نيەۆرولوگيا ينستيتۋتىنىڭ زەرتتەۋشىلەرى جاريالادى.

زەرتتەۋ بارىسىندا عالىمدار Klotho (s-KL) دەپ اتالاتىن اقۋىزدىڭ بولىنەتىن ءتۇرىنىڭ دەڭگەيىن ارتتىرۋ ارقىلى ەگدە جاستاعى اعزانىڭ جۇمىسىن جاقسارتۋعا بولاتىنىن دالەلدەدى. بۇل اقۋىزدىڭ دەڭگەيى ارتقاندا بۇلشىقەت پەن سۇيەك كۇشەيىپ، ميداعى نەيرونداردىڭ قىزمەتى جاقسارعان.

عالىمدار s-KL دەڭگەيىن گەندىك تەراپيا كومەگىمەن كوتەرىپ، جاس تىشقاندارعا ارنايى گەندى مي مەن قان اينالىمىنا ەنگىزگەن. ناتيجەسىندە ەم العان تىشقانداردىڭ ءومىر ءسۇرۋ ۇزاقتىعى -20 عا ارتقان. ولار بەلسەندىرەك بولىپ، بۇلشىقەت ماسساسى كوبەيىپ، سۇيەك ساۋلىعى جاقسارعان. سونىمەن قاتار، مي قىزمەتى جاقسارىپ، كوگنيتيۆتىك فۋنكتسيالاردا وڭ وزگەرىستەر بايقالعان.

زەرتتەۋ توبى Klotho اقۋىزىنىڭ كوگنيتيۆتىك بۇزىلىستاردى ەمدەۋدەگى ءرولىن پاتەنتتەپ تە ۇلگەردى. ەندىگى كەزەكتە بۇل تەراپيانى ادامدارعا قولدانۋ مۇمكىندىگىن زەرتتەۋ جانە پرەپاراتتى قاجەتتى مۇشەلەرگە ءتيىمدى جەتكىزۋ جولدارىن ازىرلەۋ قالدى.

بۇل جاڭالىق سالاۋاتتى قارتايۋ باعىتىنداعى عىلىمداعى ۇلكەن سەرپىلىس بولماق.