عالىمدار: كورە الماۋشىلىق - پايدالى قاسيەت

استانا. قازاقپارات - عالىمدار كورە الماۋشىلىق ميدىڭ دەنەگە اۋىرلىق تۇسكەندە جاۋاپ قايىراتىن بولىگى ارقىلى پايدا بولاتىندىعىن انىقتاپ وتىر. ونىڭ جاقسى، جامان تۇرلەرى بولسىن سپورت پەن مانساپتا ۇلكەن جەتىستىكتەرگە جەتۋگە كومەكتەسەدى. مۇنىمەن قاتار، ومىردە نە نارسەنى قالايتىندىعىمىزدى ايقىنداپ بەرەدى.

ولاي بولسا بۇل قاسيەتتىڭ پايدالى تۇستارىن انىقتايىق.

كورە الماۋشىلىق سەزىمىنىڭ ارقاسىندا ميدىڭ نازار مەن ەستە ساقتاۋعا جاۋاپ بەرەتىن بولىگى ىسكە قوسىلادى.

اجەلەرىمىز بەن انالارىمىز، مەكتەپتەگى ۇستازدارىمىز كورە الماۋشىلىقتىڭ جامان قاسيەت ەكەندىگىن ۇيرەتۋمەن بولدى. ءوسىپ ءبىلىم العان سوڭ ەموسيانىڭ جاقسى نەمەسە جامان بولمايتىندىعىن انىقتادىق.

ەندىگى كەزەكتە كورەالماۋشىلىقتىڭ قاي ساتتەردە تۋىندايتىندىعىنان بۇرىن، قانداي پايداسى بار ەكەنىن انىقتايىق.

شىن مانىندە نەنى قالايتىندىعىڭىزدى انىقتاپ الىڭىز...

كورە الماۋشىلىقتىڭ ارقاسىندا وزىمىزگە شىن مانىندە نە كەرەكتىگىن انىقتاپ الۋىمىزعا بولادى. ونىڭ جوقتىعى دا ءدال سولاي تۇسىندىرىلەدى. مىسالى، جان قۇربىڭىزدىڭ سۇلۋلىق سايىسىنان ءبىرىنشى ورىن العانىن ەستىگەن سوڭ تەك قۋانعان بولساڭىز، 5 جىل بۇرىن وزىڭىزگە لايىق جولدى تاڭداعاندىعىڭىز.

ءوزىڭىز ارمانداعان وقۋ ورنىنا سىنىبىڭىزداعى ۇلگەرىمى ناشار وقۋشى قيىندىقسىز تۇسكەن جاعدايدا قانداي اسەردە بولدىڭىز؟

ارتىنان ءسوز تاراتىپ، ونىمەن قارىم-قاتىناستى ءۇزدىڭىز بە؟ مۇنىڭ ءبىرىن دە جاساماعان بولساڭىز، ءسىز ءوز جولىڭىزبەن اداسپاي ءجۇرىپ كەلەسىز.

...باسقا ادامدار نەنى قالايدى؟

جاسىمىز ۇلعايعان سايىن بۇل قاسيەت بويىمىزدان كەتە باستايدى. ستاتيستيكالىق مالىمەتتەرگە سۇيەنسەك، 30 جاسقا دەيىنگى 4 ادامنىڭ 3 ى، 60 جاستان اسقانداردىڭ تەك 1 ى وسى قاسيەتكە يە بولادى.

نەمىس الەۋمەتتانۋشىسى گەلمۋت شەك وسى قاسيەتتىڭ ارقاسىندا عانا قوعامنىڭ ءبىرتۇتاستىعى ساقتالىپ تۇرعاندىعىن العا تارتادى.

ول بولماعان جاعدايدا ادامدار العا ۇمتىلمايتىن ەدى دەيدى. ال فرانسۋز پسيحولوگى رەنە جەرار كورە الماۋشىلىقتىڭ ارقاسىندا ەلىكتەۋ تۋىپ، ادام بالاسى بار ءومىرىن جان تالاسىپ ءومىر سۇرۋگە ارنايدى. سول جان تالاسۋدىڭ ارقاسىندا مەملەكەتكە پايدا تۇسەدى دەيدى.

قوعام مۇشەلەرىمەن جارىسۋ

وزگەنى كورەالمايمىن دەپ جاماندىق جاساۋدىڭ ەش قاجەتى جوق. مىسالى، قۇربىڭىز قاجەت ۋاقىتىندا سالماق تاستاپ، سىمباتتى بولىپ جۇرسە، ءسىز دە جارىسىڭىز. مەنەن دە سىمباتتى بولىپ كەتپەسىن دەپ شايىنە ارتىق قانت سالىپ جىبەرۋ سەكىلدى ارامدىق جارامايدى. عالىمدار قاي جەردە جۇرسەڭىز دە جارىسىپ جۇرگەندەي سەزىمدە بولىڭىز دەپ كەڭەس بەرەدى.

بارلىعىن كوزبەن كورىڭىز

پسيحولوگ ماماندار ارماندار ورىندالۋ ءۇشىن ونى كوزبەن ەلەستەتىپ كورە ءبىلۋ كەرەكتىگىن ايتادى. پروفەسسور پسيحولوگ سيۋزان فيكس قالاۋىڭىزدى، جەتىستىكتەرىڭىزدى ويشا ەلەستەتپەيىنشە ورىندالمايتىندىعىن ايتادى. مۇنىمەن قاتار كەشە دوسىڭىز ءمىنىپ جۇرگەن كولىكتى عانا ەمەس، وعان قول جەتكىزۋ جولىن دا ەلەستەتكەنىڭىز ءجون. سول كولىككە وتىرىپ وتالدىرىپ جاتقانىڭىز، ەسىگىن اشقانداعى داۋىسى بارلىعى بۇگە-شۇگەسىنە دەيىن ەلەستەۋى قاجەت. وكىنىشكە قاراي جاي عانا ەلەستەتۋ جەتكىلىكسىز، ارماندار ورىندالۋ ءۇشىن قاجىرلى ەڭبەك قاجەت.

كىمدى كورە الماساڭىز سولاردان ۇيرەنىڭىز

پسيحولوگتار بۇل ءادىستىڭ جاقسى جۇمىس ىستەيتىندىگىن ايتادى. الايدا ول ادامداردىڭ تىكەلەي كوشىرمەسىن جاساۋدىڭ قاجەتى جوق، تەك ولار قولداناتىن ادىستەردى پايدالانساق بولعانى.

دايىنداعان: قارلىعا بۇيەنباي

massaget.kz