عالىمدار ارالعا سەكسەۋىل وتىرعىزۋ جۇمىسىنا جوعارى باعا بەردى - مينيستر
استانا. KAZINFORM - بيىل ارال تۇبىنە كاتكو كومپانياسىنىڭ قاراجاتىنا 120 مىڭ گەكتار جەرگە سەكسەۋىل تۇقىمى جانە 12 مىڭ گەكتارعا سەكسەۋىل كوشەتى وتىرعىزىلدى.
ارالدى قۇتقارۋ جۇمىسى تۋرالى ەكولوگيا جانە تابيعي رەسۋرستار ءمينيسترى ەرلان نىسانبايەۆ ايتىپ بەردى.
- 2024-جىلدان باستاپ ارال تەڭىزىنىڭ قۇرعاعان تۇبىنە سەكسەۋىل ەگۋ بيۋجەتتەن تىس، ءىرى كومپانيالاردىڭ قاراجاتى ەسەبىنەن جۇزەگە اسىرىلىپ جاتىر. مىسالى، «قازمۇنايگاز» كومپانياسىنىڭ قاراجاتى ەسەبىنەن وتكەن جىلدىڭ كوكتەمىندە 15 مىڭ گەكتار جەرگە 4,4 ميلليون سەكسەۋىل كوشەتى وتىرعىزىلدى. بيىل كاتكو كومپانياسى 2,2 ميلليارد تەڭگە ءبولىپ، 120 مىڭ گەكتار جەرگە سەكسەۋىل تۇقىمى ەگىلدى جانە 12 مىڭ گەكتارعا سەكسەۋىل كوشەتى وتىرعىزىلدى. ورمان مەليوراتسيالىق جۇمىسىن ساپالى كوشەتتەرمەن قامتاماسىز ەتۋ ماقساتىندا جەرسىنۋى مەن ومىرشەڭدىگى جوعارى تۇقىمداردى وسىرەتىن ورمان پيتومنيكتەرى قۇرىلىپ جاتىر، - دەدى ەرلان نىسانبايەۆ ۇكىمەت وتىرىسىندا.
سونداي-اق ارال قاسىنداعى قازالى قالاسىندا وتكەن جىلى 33 گەكتار جەرگە، قۋاتى جىلىنا 3 ميلليون كوشەت ورمان پيتومنيگى سالىنىپ، اگروتەحنيكالىق تالاپتارعا سايكەس 10 گەكتارىنا سەكسەۋىل تۇقىمى ەگىلدى.
- بيىل ارالدىڭ قۇرعاعان تۇبىنە 15 گەكتار جەردە پيتومنيكتى جوبالاۋ جانە ۇڭعىمالاردى بۇرعىلاۋ جۇمىستارى جۇرگىزىلىپ جاتىر. وسى پيتومنيكتە ارالدىڭ قۇرعاعان ءتۇبىنىڭ اريدتىك جاعدايدا بەيىمدەلگەن كوشەتتەر وتىرعىزىلادى. بۇل باعىتتاعى جۇمىستى قىزىلوردا وبلىسىندا قۇرىلعان قازاق ورمان شارۋاشىلىعى عىلىمي-زەرتتەۋ ينستيتۋتى فيليالىنىڭ تۇراقتى عىلىمي سۇيەمەلدەۋىمەن جۇزەگە اسىرىلىپ جاتىر. بۇگىندە سالا ساراپشىلارى مەن عالىمدار سەكسەۋىلدى وتىرعىزۋ جۇمىستارىنىڭ ناتيجەلەرىنە جوعارى باعا بەردى، - دەيدى ۆەدومستۆو باسشىسى.
كەشە عانا ارالعا جويىلۋعا شاق قالعان قاياز بەن پىلماي بالىعىنىڭ قايتا ورالعانى تۋرالى جازعان ەدىك.
سونداي-اق Kazinform اگەنتتىگىنىڭ مەنشىكتى ءتىلشىسى ارال تەڭىزىنىڭ ورنىندا ءبىر كەزدەرى گۇلدەنگەن قالالار مەن ساۋلەت ەسكەرتكىشتەرى بولعانى تۋرالى جازدى. ارحەولوگتەر سول تىزىمدەگى ارال اسار جانە كەردەرى كەسەنەلەرىن بىرەگەي جادىگەر سانايدى.