عالىمدار العاش رەت كۇننىڭ پوليۋستەرىن ءتۇسىردى
ەۋروپالىق عارىش اگەنتتىگىنىڭ Solar Orbiter اپپاراتى كۇندى جەر وربيتاسىنىڭ جازىقتىعىنان تىس بۇرىشپەن باقىلاپ، العاش رەت ونىڭ پوليۋستەرىنىڭ سۋرەتتەرىن الدى، دەپ حابارلادى turkystan.kz.
2025 -جىلدىڭ اقپانىنان باستاپ اپپاراتتىڭ وربيتاسى كۇن ەكۆاتورىنا قاتىستى 17 گرادۋسقا ەڭكەيتىلگەن. بۇعان دەيىن كۇن تەك «ەكۆاتورلىق» باعىتتان ءتۇسىرىلىپ كەلگەن. ەندى عالىمدار جۇلدىزدىڭ وڭتۇستىك ءپوليۋسىن كورە الدى.
باقىلاۋ كەزىندە ءۇش عىلىمي قۇرال قولدانىلعان. ولار: PHI كۇننىڭ بەتكى ماگنيت ءورىسىنىڭ كارتاسىن جاساپ، ونى كادىمگى جارىقپەن سۋرەتتەدى، EUI كۇننىڭ ىستىق سىرتقى قابىعى - كورونانى ۋلتراكۇلگىن ساۋلەدە كورسەتتى، SPICE كۇن اتموسفەراسىنىڭ ءارتۇرلى قاباتتارىن زەرتتەدى.
ناۋرىز ايىندا جۇرگىزىلگەن العاشقى باقىلاۋ كۇننىڭ وڭتۇستىك پوليۋسىندە قاراما-قارسى ماگنيت ورىستەرىنىڭ قاتار جۇرگەنىن كورسەتتى. بۇل قۇبىلىس تەك كۇن بەلسەندىلىگىنىڭ شەگىنە جەتكەندە بايقالادى. عالىمدار كۇن الداعى 5-6 جىلدا بەلسەندىلىكتىڭ تومەنگى فازاسىنا وتەدى دەپ وتىر.
سونداي-اق، SPICE قۇرالى كۇن زاتتارىنىڭ قوزعالىس جىلدامدىعىن ولشەپ، كۇن جەلىنىڭ قالاي پايدا بولاتىنىن تۇسىنۋگە كومەكتەستى.
2029 -جىلى اپپارات وربيتاسىنىڭ ەڭكەيۋى 33 گرادۋسقا جەتپەك. بۇل كۇن پوليۋستەرىن ودان ءارى ءدال زەرتتەۋگە جول اشادى.