عالىمدار اككۋمۋلياتور باتارەيالارىنىڭ قاۋىپسىزدىگىنە الاڭداۋلى

استانا. KAZINFORM - اككۋمۋلياتورلىق باتارەيالاردى قايتا وڭدەۋ جانە كادەگە جاراتۋ ءۇشىن ءتيىستى ينفراقۇرىلىم بولماسا قاۋىپ تۋدىرادى. بۇل پىكىردى Nazarbayev University ەنەرگەتيكا جانە جاڭا ماتەريالدار عىلىمي ورتالىعىنىڭ ديرەكتورى، پروفەسسور جۇماباي باكەنوۆ العا تارتتى.

«ليتي- يوندى باتارەيالار وتە قاۋىپتى. ولاردى كادەگە جاراتۋ جانە قايتا وڭدەۋ ءۇشىن ارنايى تەحنولوگيالار قاجەت، ويتكەنى ولاردىڭ قۇرامىندا جانعىش جانە ۋلى ماتەريالدار بار. ۇيالى تەلەفوننىڭ كىشكەنتاي باتارەياسىندا قانشاما ەنەرگيا بار، ال ەلەكتروموبيل باتارەياسىنىڭ قۋاتىن ەلەستەتە بەرىڭىز» ، - دەيدى جۇماباي باكەنوۆ ەلوردادا ءوتىپ جاتقان INESS-2024 حالىقارالىق كونفەرەنسياسىندا.

سونداي-اق، كونفەرەنسياعا شاقىرىلعان قوناقتاردىڭ اراسىندا Samsung SDI- ءدىڭ بۇرىنعى باس ينجەنەرى، پروفەسسور سۋن سۋ كيم بولدى. ول كەزىندە Samsung اككۋمۋلياتورلارىن وندىرۋگە جاۋاپتى بولعان.

شەتەلدىك مەيمان ج. باكەنوۆتىڭ ليتي- يوندى اككۋمۋلياتورلاردىڭ قاۋىپتىلىگى تۋرالى دايەگىن قولداپ وتىر. س. كيم ەلەكتروموبيلدەردىڭ ىشىنە ورناتىلعان باتارەيالار جان -جاقتى جانە بەلگىلى ءبىر جاعدايلاردا وتە جارىلعىش ەنەرگيا كوزى ەكەنىن ءتۇسىندىردى.

الايدا، مامان قازاقستان ەلەكتروموبيلدەر سانىنىڭ وسۋىنە ءالى الاڭداماۋىنا بولاتىنىن ايتادى.

ونىڭ سوزىنشە، قازاقستاندىق عالىمداردىڭ پايدالانىلعان اككۋمۋلياتورلاردى بولاشاقتا كادەگە جاراتۋ نەمەسە قايتا وڭدەۋ ءۇشىن تەحنولوگيالاردى دايىنداۋعا جەتكىلىكتى ۋاقىتى بار. سونىمەن قاتار سۋن سۋ كيم پايدالانىلعان اككۋمۋلياتوردى جويۋ جانە قايتا كادەگە جاراتۋ وڭاي پروتسەدۋرا ەمەس جانە ءتيىستى ينفراقۇرىلىمدى دايىنداۋ بەس جىلعا دەيىن سوزىلۋى مۇمكىن ەكەنىن ايتىپ وتىر.

ايتا كەتەيىك، بۇگىن Nazarbayev University-دە قازاق عالىمى قانىش ساتبايەۆتىڭ 125 جىلدىق مەرەيتويىنا ارنالعان INESS-2024 نانوماتەريالدار جانە ەنەرگيا ساقتاۋدىڭ وزىق جۇيەلەرىنە ارنالعان 12- حالىقارالىق كونفەرەنسياسى باستالدى.

ءۇش كۇنگە سوزىلاتىن (7-9-تامىز) INESS كونفەرەنسياسى ورتالىق ازياداعى نانوماتەريالدار مەن ەنەرگيا ساقتاۋ جۇيەلەرىنىڭ سوڭعى ترەندتەرىن تالقىلاۋعا ارنالعان جەتەكشى پلاتفورما بولىپ وتىر. ايتۋلى شاراعا جاپونيا، گەرمانيا، قىتاي، وڭتۇستىك كورەيا، رەسەي، ۇلى بريتانيا، تايۆان جانە قازاقستاننان 150-دەن استام زەرتتەۋشى عالىمدار قاتىسۋدا.

بيىل INESS حالىقارالىق كونفەرەنسياسىندا ەنەرگيا ساقتاۋ جۇيەلەرىنە ارنالعان وزىق ماتەريالدار، سەنسورلىق ماتەريالدار مەن تەحنولوگيالار، ەنەرگيا ساقتاۋدىڭ بالاما جۇيەلەرى، جاڭارتىلاتىن ەنەرگيا كوزدەرى، ەكولوگيا جانە تۇراقتى دامۋ سياقتى ماڭىزدى سالالارداعى تەحنولوگيالىق جەتىستىكتەردىڭ ماسەلەلەرى مەن كەلەشەگى تالقىلانادى.

ۇيىمداستىرۋشىلاردىڭ ايتۋىنشا، جاسىل ەنەرگەتيكا جانە ەنەرگيانى ساقتاۋ جۇيەلەرىنە ارنالعان وزىق نانوماتەريالدار سالاسىنداعى زەرتتەۋلەر ايرىقشا وزەكتى.

اۆتور

داۋلەت ىزتىلەۋ