ءاليحان سمايىلوۆ قازاقستاندىقتارعا ۇندەۋ جاسادى

استانا. KAZINFORM -  پرەزيدەنت جارلىعىمەن قىزمەتىنەن بوساتىلعان ءاليحان سمايىلوۆ قازاقستاندىقتارعا العىس ايتتى.

«قۇرمەتتى قازاقستاندىقتار! بۇگىن مەملەكەت باسشىسى قازاقستان رەسپۋبليكاسى ۇكىمەتىنىڭ ورنىنان ءتۇسۋىن قابىلدادى. ەڭ الدىمەن، پرەزيدەنت قاسىم-جومارت كەمەل ۇلى توقايەۆقا سىندارلى ۋاقىتتا قازاقستان رەسپۋبليكاسىنىڭ ۇكىمەتىن باسقارۋعا سەنىم بىلدىرگەنى ءۇشىن زور العىسىمدى بىلدىرەمىن. وتكەن ەكى جىل قوعام ءۇشىن شەشۋشى كەزەڭ بولدى. مەملەكەت باسشىسى جاڭا ادىلەتتى قازاقستاندى قۇرۋعا باعىتتالعان اسا ماڭىزدى ساياسي جانە ەكونوميكالىق رەفورمالارعا باستاماشىلىق جاسادى. ۇكىمەت وسى رەفورمالاردى ىسكە اسىرۋ جانە ەلىمىزدىڭ تۇراقتى الەۋمەتتىك-ەكونوميكالىق دامۋىن قامتاماسىز ەتۋ ءۇشىن قىزمەت ەتتى. ۇكىمەت پەن جەرگىلىكتى اتقارۋشى ورگانداردىڭ بىرلەسكەن جۇمىسىنىڭ ارقاسىندا ءبىرقاتار ناتيجەلەرگە قول جەتكىزىلدى. وتكەن جىلدىڭ قورىتىندىسى بويىنشا ەكونوميكانىڭ ءوسۋى %5,1 تى قۇرادى» دەپ جازدى ۇكىمەتتىڭ بۇرىنعى باسشىسى Facebook پاراقشاسىندا.

ونىڭ ايتۋىنشا، بۇكىل نەگىزگى سەكتورلار وڭ دامۋ ديناميكاسىن كورسەتكەن. ينفلياتسيا ەكى ەسە تومەندەگەن.

ەلىمىزگە تارتىلعان تىكەلەي شەتەلدىك ينۆەستيتسيا كولەمى ەكى جىل قاتارىنان سوڭعى ون جىلدىقتاعى ەڭ جوعارى كورسەتكىشتەردىڭ ءبىرى بولدى. ونىڭ جىلدىق كولەمى 26-28 ميلليارد دوللاردى قۇرادى.

«ۇلتتىق قوردىڭ اكتيۆتەرى بىلتىر 4 ميلليارد دوللارعا ءوسىپ، 60 ميلليارد دوللاردان استى. رەيتينگتىك اگەنتتىكتەر ۇلتتىق ەكونوميكانىڭ تاۋەلسىز رەيتينگى مەن ينۆەستيسيالىق سەنىمدىلىگىن راستادى. ۇكىمەتتەگى بارلىق ارىپتەستەرىمە، سونداي-اق دەپۋتاتتىق كورپۋسقا بىرلەسكەن جانە ناتيجەلى جۇمىس ءۇشىن شىن جۇرەكتەن ريزاشىلىعىمدى بىلدىرەمىن. سونىمەن قاتار ەلىمىزدىڭ دامۋىنا ادال ەڭبەگىمەن ۇلەس قوسىپ جۇرگەن ءاربىر قازاقستاندىققا العىس ايتامىن» دەپ تۇيىندەدى ءاليحان سمايىلوۆ.

ەسكە سالا كەتەيىك، كەشە قازاقستان ۇكىمەتى وتستاۆكاعا كەتتى.

7-اقپان كۇنى مەملەكەت باسشىسى قاسىم-جومارت توقايەۆتىڭ توراعالىعىمەن ۇكىمەتتىڭ كەڭەيتىلگەن وتىرىسى وتەدى.