ءاليحان سمايىلوۆ قازاقستان-قىتاي جوبالارىنىڭ تىزبەسىن كەڭەيتۋدى ۇسىندى
ق ر پرەمەر-ءمينيسترى ءاليحان سمايىلوۆ استاناعا جۇمىس ساپارىمەن كەلگەن ق ح ر مەملەكەتتىك كەڭەسى پرەمەرىنىڭ ورىنباسارى ديڭ چۋە چياڭمەن كەلىسسوزدەر جۇرگىزدى، دەپ حابارلايدى Kazinform ۇكىمەتتىڭ باسپا ءسوز قىزمەتىنە سىلتەمە جاساپ.
كەزدەسۋ بارىسىندا تاراپتار ساۋدا، ينۆەستيتسيا، ونەركاسىپ، ەنەرگەتيكا، اۋىل شارۋاشىلىعى، كولىك، لوگيستيكا، مادەنيەت جانە باسقا دا سالالارداعى مەملەكەتارالىق ىنتىماقتاستىقتىڭ كەڭ اۋقىمدى ماسەلەلەرىن تالقىلادى.
ءاليحان سمايىلوۆ اتاپ وتكەندەي، قازىرگى ۋاقىتتا قازاقستان مەن قىتايدىڭ ەكىجاقتى تاۋار اينالىمى جوعارى كورسەتكىشتەرگە قول جەتكىزۋدە. ماسەلەن، وتكەن جىلى اتالعان كورسەتكىش 35 پايىزعا ارتىپ، $24,2 ميللياردتى قۇرايتىن تاڭعاجايىپ ناتيجەگە جەتتى، بيىل دا قارقىندى ءوسۋ جالعاسۋدا.
«10 اي ىشىندە ءوزارا ساۋدا-ساتتىق تاعى 24 پايىزعا ءوستى. وسىنداي قارقىنمەن ءبىز جاقىن ارادا ەكى ەلدىڭ مەملەكەت باسشىلارى بەلگىلەگەن تاۋار اينالىمىن $40 ميللياردقا دەيىن ۇلعايتۋ جونىندەگى ماقساتقا قول جەتكىزە الامىز دەپ سانايمىن»، - دەدى پرەمەر-مينيستر.
سونداي-اق ۇكىمەت باسشىسى 10-قاراشادان باستاپ كۇشىنە ەنگەن ۆيزاسىز رەجيم قازاقستان- قىتاي قارىم-قاتىناستارىندا جاڭا تاراۋ اشاتىنىن قوستى.
«بۇل شارا ىسكەرلىك بايلانىستاردى ىنتالاندىرۋعا، ساۋدانى جەڭىلدەتۋگە، ءوزارا ينۆەستيتسيالاردى ارتتىرۋعا جانە تۋريزمدى دامىتۋعا ايتارلىقتاي اسەر ەتەدى. بۇل، اسىرەسە، الداعى «قىتايداعى قازاقستان تۋريزمى جىلى» اياسىندا وزەكتى»، - دەدى ءاليحان سمايىلوۆ.
ۇكىمەت باسشىسى يندۋسترياليزاتسيا جانە ينۆەستيتسيا بويىنشا بىرلەسكەن قازاقستان- قىتاي جوبالارىنىڭ تىزبەسىن كەڭەيتۋدىڭ، 2026 -جىلعا دەيىنگى ساۋدا- ەكونوميكالىق ىنتىماقتاستىق باعدارلاماسىن ىسكە اسىرۋ جونىندەگى جول كارتاسىنا قول قويۋدىڭ، سونداي-اق يمپورتتىق- ەكسپورتتىق تاۋارلار ءوزارا كۋالاندىرۋ تۋرالى كەلىسىمدى جاڭارتۋدىڭ ماڭىزدىلىعىن اتاپ ءوتتى.
«وسى قۇجاتتاردا قاراستىرىلاتىن پراكتيكالىق شارالار جەتكىزىلەتىن تاۋارلار نومەنكلاتۋراسىن كەڭەيتىپ، ساۋدا سەرىكتەستىگىن ساپالى جاڭا دەڭگەيگە كوتەرەتىنىنە سەنىمدىمىن»، - دەدى پرەمەر-مينيستر.
بۇدان بولەك، ءاليحان سمايىلوۆ قازاقستاننىڭ اۋىل شارۋاشىلىعى ونىمدەرىنىڭ تاۋار اينالىمىن ارتتىرۋعا، قىتايعا ەكسپورتتى ارتتىرۋعا جانە ا و ك سالاسىندا بىرلەسكەن قايتا وڭدەۋ جوبالارىن جۇزەگە اسىرۋعا مۇددەلى ەكەنىن اتاپ ءوتتى.
سونىمەن قاتار ول ترانزيتتىك-كولىكتىك ءوزارا ءىس-قيمىل ەرەكشە ماڭىزعا يە ەكەنىن اتاپ ءوتتى. بۇگىندە قىتايدان ەۋروپاعا تاسىمالداناتىن تاۋارلاردىڭ 85 پايىزعا جۋىعى قازاقستان ارقىلى تاسىمالدانادى. وسىعان بايلانىستى رەسپۋبليكا ءوسىپ كەلە جاتقان سۇرانىستى تولىق قامتاماسىز ەتۋ ماقساتىندا ينفراقۇرىلىمىنىڭ وتكىزۋ قابىلەتىن ارتتىرۋ بويىنشا بەلسەندى شارالار قابىلداۋدا.
پرەمەر-مينيستر كەدەندىك پروتسەستەردى جەدەلدەتۋ ماسەلەسىنە ەرەكشە نازار اۋداردى. بۇگىندە ەكى ەلدىڭ كەدەن قىزمەتتەرى شەكاراداعى اۆتوموبيل وتكىزۋ بەكەتتەرىنىڭ وتكىزۋ قابىلەتى مەن جۇمىس ۋاقىتىن ۇلعايتۋ تۋرالى كەلىسىمگە كەلدى. اتاپ ايتقاندا، «نۇر جولى - قورعاس» وتكىزۋ بەكەتى تاۋلىك بويى جۇمىس ىستەي باستاسا، قالعان اۆتوكولىك بەكەتتەرى 12 ساعاتتىق 7 كۇندىك جۇمىس كەستەسىنە كوشتى.
«سيفرلاندىرۋ مەن پروتسەستەردى اۆتوماتتاندىرۋدىڭ ارقاسىندا شەكارادان ءوتۋ ۋاقىتى قىسقاردى. وسى باعىتتاعى جۇمىستاردى جالعاستىرۋ ماڭىزدى»، - دەدى ول.
سونداي-اق ءاليحان سمايىلوۆ ەلدەر اراسىنداعى اۋە رەيستەرىنىڭ سانىن ودان ءارى ارتتىرۋدىڭ جانە ەنەرگەتيكا سالاسىنداعى ءىرى جوبالاردى جۇزەگە اسىرۋدىڭ ماڭىزدى ەكەنىن اتاپ ءوتتى. ولاردىڭ قاتارىندا «قازاقستان- قىتاي» مۇناي قۇبىرىنىڭ وتكىزۋ قابىلەتىن كەڭەيتۋ، شىمكەنتتەگى مۇناي وڭدەۋ زاۋىتىن جاڭعىرتۋ جانە ت. ب. بار.
«قازاقستان ۇكىمەتى قىتايمەن بارلىق سالادا تولىق اۋقىمدى جانە ءوزارا ءتيىمدى ىنتىماقتاستىقتى دامىتۋعا دايىن»، - دەدى پرەمەر-مينيستر.
ءوز كەزەگىندە ق ح ر مەملەكەتتىك كەڭەسى پرەمەرىنىڭ ورىنباسارى ديڭ چۋە چياڭ بيىلعى جىل قازاقستان مەن قىتاي ءۇشىن وتە جەمىستى بولعانىن اتاپ ءوتىپ، ق ح ر بارلىق ءوزارا ءتيىمدى سالالارداعى ىنتىماقتاستىقتى ارتتىرۋعا دايىن ەكەنىن اتاپ ءوتتى.
«قىتاي مەن قازاقستان جاقىن كورشى، جاقسى دوس جانە سەرىكتەستەر. بۇگىندە ەكى ەل دە ءوز دامۋى مەن جاندانۋىنىڭ ماڭىزدى كەزەڭىندە تۇر. قيلى وزگەرىستەر جاعدايىندا قىتاي مەن قازاقستان ۇلكەن سىناقتارعا بەتپە بەت كەلدى. سوندىقتان ءبىز ىنتىماقتاستىق رۋحىندا بارلىق نەگىزگى ماسەلەلەر بويىنشا ءوزارا قولداۋدى كۇشەيتۋىمىز كەرەك. قىتاي تاراپى بۇرىنعىداي قازاقستاندى جانە دامۋ مەن وركەندەۋگە باعىتتالعان بارلىق كۇش-جىگەردى تاباندى تۇردە قولدايتىن بولادى»، - دەدى ديڭ چۋە چياڭ.
اۆتور
ەلميرا ورالبايەۆا