ءالى التىن ءۇشىن كۇرەسەمىن - ناريمان قۇربانوۆ
الماتى. KAZINFORM - پاريج وليمپياداسىنىڭ كۇمىس جۇلدەگەرى ناريمان قۇربانوۆ الماتىعا ۇشىپ كەلدى.
ناريمان قۇربانوۆ باستاعان وليمپياداشىلار الماتىعا ورالدى. سپورتشىلاردى الماتىلىقتار ىستىق ىقىلاسپەن قارسى الدى. سالتاناتتى ءراسىم كەزىندە وليمپيادانىڭ كۇمىس جۇلدەگەرى جارىستان العان اسەرىمەن ءبولىستى.
«ءبارى ماعان ءۇمىت ارتتى، ءوزىم جۇلدە الاتىنىما سەندىم. ءبىراق قازىرگى دەيىن مۇنىڭ ءبارى شىنىمەن بولىپ جاتقانىنا سەنە الار ەمەسپىن. جەڭىسىمدى ەلىمە ارنايمىن. ولاردىڭ قولداۋىن سەزىنىپ جاتىرمىن، كوپ العىس الدىم. قازىر ەلىمىزدە سپورتتىق گيمناستيكاعا جاقسى كوڭىل ءبولىنىپ جاتىر. الىنعان مەدالدان كەيىن ودان دا جاقسى جاعداي جاسالادى دەپ ويلايمىن»، - دەدى ول.
سونداي-اق وليمپيادانىڭ كۇمىس جۇلدەگەرى الداعى جوسپارلارىمەن ءبولىستى.
«شەبەرلىگىمنىڭ شىڭىنا ەندى شىعىپ كەلە جاتىرمىن. مەنىڭ باعىتىمداعى گيمناست ءۇشىن سپورتتا قالىپ، التىن ءۇشىن كۇرەسۋ دۇرىس بولادى»، - دەدى ناريمان قۇربانوۆ.
ەسكە سالايىق، 3-تامىز كۇنى ناريمان قۇربانوۆ پاريج وليمپياداسىندا سپورتتىق گيمناستيكانىڭ ات سناريادىنداعى جاتتىعۋدا كۇمىس جۇلدەگە قول جەتكىزدى.
قۇربانوۆتىڭ جەڭىسىن جاقىندارى ەرەكشە ەموتسيامەن تىكەلەي ەفيردە تاماشالادى.
اۆتور
دوسبول اتاجان