بۇل شەشىم دجاكارتا قالاسىندا وتكەن كوميتەت وتىرىسىندا قابىلداندى. نوميناتسيالىق ءوتىنىمدى قازاقستان تاراپى ازىرلەپ، حالىقارالىق ۇيىمنىڭ قاراۋىنا ۇسىنعان. بۇل تۋرالى قازاقستان جازۋشىلار وداعى حابارلادى.
«عىلىم ورداسى» ر م ك قورىندا ساقتالعان اتالعان جيناق -قازاق حالقىنىڭ تاريحى، ادەبيەتى مەن رۋحاني ومىرىنەن مول ماعلۇمات بەرەتىن قۇندى جازبا مۇرا. ءماشھۇر ءجۇسىپ كوپەي ۇلى ءوز شىعارمالارىندا ⅩⅨ عاسىردىڭ ەكىنشى جارتىسى مەن ⅩⅩ عاسىردىڭ باسىنداعى قوعامدىق ءومىردى، ەلدىڭ تۇرمىس-تىرشىلىگىن، سالت-ءداستۇرى مەن دۇنيەتانىمىن كەڭىنەن قامتىعان. ونىڭ ەڭبەكتەرىندە اعارتۋشىلىق ۇستانىم، عىلىم مەن بىلىمگە شاقىرۋ، ۇلتتىق قۇندىلىقتاردى دارىپتەۋ يدەيالارى ايرىقشا ورىن الادى.
بۇل ماڭىزدى جەتىستىككە قول جەتكىزۋدە «عىلىم ورداسى» ر م ك ورتالىق عىلىمي كىتاپحاناسىنىڭ ماماندارى ەلەۋلى ەڭبەك اتقاردى. ولار نوميناتسيالىق قۇجاتتاردى دايىنداپ، سيرەك باسىلىمداردىڭ تاريحي جانە مادەني قۇندىلىعىن عىلىمي تۇرعىدان دايەكتەۋگە، قاجەتتى دەرەكتەر مەن ماتەريالداردى جيناقتاۋعا اتسالىستى.
ءماشھۇر ءجۇسىپ مۇراسىنىڭ حالىقارالىق دەڭگەيدە مويىندالۋى - قازاقتىڭ جازبا مادەنيەتى مەن تاريحي جادىن الەمگە تانىتۋ جولىنداعى ماڭىزدى قادام. سونىمەن بىرگە بۇل شەشىم ۇلتتىق رۋحاني مۇرانى ساقتاۋ، عىلىمي تۇرعىدان زەردەلەۋ جانە ونى كەلەر ۇرپاققا جەتكىزۋ باعىتىنداعى جۇمىستاردىڭ ماڭىزىن تاعى ءبىر مارتە ايقىندايدى.
يۋنەسكو-نىڭ «الەم جادى» وڭىرلىك تىزىمىنە ەنۋى ۇلى ويشىلدىڭ شىعارماشىلىق مۇراسىن حالىقارالىق عىلىمي ورتادا كەڭىنەن ناسيحاتتاۋعا، ونى تەرەڭ زەرتتەۋگە جانە الەمدىك مادەني مۇرا اياسىندا تانىتۋعا جاڭا مۇمكىندىكتەر اشادى.
ءماشھۇر ءجۇسىپتىڭ بەينەسى قالاي ساقتالىپ قالعانىن بۇعان دەيىن جازعان ەدىك.