قازاقتىڭ كورنەكتى جازۋشىسى ءارى قوعام قايراتكەرى ءابىش كەكىلبايەۆتىڭ ءومىرى مەن شىعارماشىلىعىنا ارنالعان «كوريفەي» كىتابى 21-قازاندا XII باكۋ حالىقارالىق كىتاپ جارمەڭكەسىندە تانىستىرىلدى. كىتاپتىڭ ازەربايجان تىلىندەگى نۇسقاسى حالىقارالىق تۇركى مادەنيەتى مەن مۇراسى قورىنىڭ قولداۋىمەن جارىق كوردى.
جيىنعا حالىقارالىق تۇركى مادەنيەتى مەن مۇراسى قورىنىڭ پرەزيدەنتى اقتوتى رايىمقۇلوۆا، قازاقستاننىڭ ازەربايجانداعى ەلشىسى ءالىم بايەل، ازەربايجان ۇلتتىق عىلىم اكادەمياسىنىڭ پرەزيدەنتى يسا گابيببەيلي، ازەربايجانداعى اتاتۇرىك ورتالىعىنىڭ ديرەكتورى نيزامي دجافاروۆ، كىتاپ اۆتورى ساۋىتبەك ءابدىراحمانوۆ جانە اۋدارماشىلار حانىم ايدىن مەن رابيعا نازىم قىزى قاتىستى.
اقتوتى رايىمقۇلوۆا «كوريفەي» كىتابىنىڭ ءابىش كەكىلبايەۆتىڭ ادەبي ءارى رۋحاني مۇراسىن زەرتتەپ، كەڭىنەن ناسيحاتتاۋداعى ماڭىزىن اتاپ ءوتتى. ونىڭ ايتۋىنشا، شىعارمانىڭ ازەربايجان تىلىنە اۋدارىلۋى قازاق قالامگەرىنىڭ تۋىندىلارىن كەڭىرەك تانىتۋعا جانە تۇركى حالىقتارى اراسىنداعى مادەني بايلانىستى نىعايتۋعا جول اشادى.
ساۋىتبەك ءابدىراحمانوۆ كىتاپتىڭ جازىلۋ تاريحىنا، ءابىش كەكىلبايەۆتىڭ ءومىرى مەن شىعارماشىلىعىنىڭ نەگىزگى كەزەڭدەرىنە، سونداي-اق قازاق ادەبيەتى مەن قوعامدىق ويدىڭ دامۋىنا قوسقان ۇلەسىنە توقتالدى. ال اۋدارماشىلار باسىلىمدى ازەربايجان تىلىنە ءتارجىمالاۋ بارىسىندا جيناقتاعان تاجىريبەسىن ءبولىستى.
جيىنعا قاتىسۋشىلار ءابىش كەكىلبايەۆتىڭ شىعارماشىلىق مۇراسى تۇركى حالىقتارىنىڭ ادەبيەتىندە ايرىقشا ورىن الاتىنىن اتاپ ءوتتى.
ال حالىقارالىق تۇركى مادەنيەتى مەن مۇراسى قورىنىڭ جاڭا باسىلىمدارىن تانىستىرۋ شارالارى XII باكۋ حالىقارالىق كىتاپ جارمەڭكەسىندە 26-قازانعا دەيىن جالعاسادى.
ەسكە سالا كەتەيىك، بۇعان دەيىن استانادا «كەكىلبايەۆ تۇلعاسى» كىتابىنىڭ تۇساۋكەسەرى وتكەنىن حابارلاعان ەدىك.