ءابىش كەكىلباي ۇلىنىڭ مەرەيتويى: ەرلان قوشانوۆ پرەزيدەنت قۇتتىقتاۋىن جەتكىزدى
استانا. KAZINFORM - اقتاۋ قالاسىندا حالىق جازۋشىسى، كورنەكتى مەملەكەت قايراتكەرى ءابىش كەكىلباي ۇلىنىڭ 85 جىلدىق مەرەيتويىنا ارنالعان حالىقارالىق عىلىمي-تاجىريبەلىك كونفەرەنسيا ءوتتى.
جيىنعا مەملەكەت باسشىسىنىڭ تاپسىرماسىمەن ءماجىلىس سپيكەرى ەرلان قوشانوۆ قاتىستى.
جينالعان قاۋىم الدىندا ءسوز سويلەگەن ءماجىلىس ءتوراعاسى الدىمەن پرەزيدەنت قاسىم-جومارت توقايەۆتىڭ قۇتتىقتاۋ حاتىن وقىپ بەردى.
- ءابىش كەكىلباي ۇلى - ءتول مادەنيەتىمىزدىڭ كوكجيەگىن كەڭەيتىپ، جاڭا دەڭگەيگە كوتەرگەن زاڭعار جازۋشى، كلاسسيك قالامگەر. ءسوز زەرگەرى ەرەكشە دارىنى مەن تەلەگەي-تەڭىز ءبىلىمىنىڭ ارقاسىندا شەبەرلىكتىڭ شىڭىنا شىعىپ، تەڭدەسسىز تۋىندىلار جازدى. ءابىش كەكىلباي ۇلى - تاۋەلسىزدىگىمىزدىڭ تۇعىرىن بەكەمدەپ، مەملەكەتتىگىمىزدى نىعايتۋعا ولشەۋسىز ۇلەس قوسقان قايراتكەر. ول جوعارى لاۋازىمدى قىزمەتتەردى ابىرويمەن اتقارىپ، حالقىنا قالتقىسىز قىزمەت ەتتى. ۇلت مۇددەسىن جانە ەل بىرلىگىن قاشاندا بارىنەن بيىك قويدى. ءابىش كەكىلباي ۇلىنىڭ وتانشىلدىعى، پاراساتتىلىعى، ءبىلىمپازدىعى مەن ەڭبەكقورلىعى - وسكەلەڭ ۇرپاققا ۇلگى- ونەگە. ونىڭ تانىمى تەرەڭ، تالعامى مول مۇراسى ءالى تالاي بۋىنعا رۋحاني ازىق بولارى ءسوزسىز. «قازاق دالاسىنىڭ ءار تاسى - قاعبام، ءار بۇتاسى - ساجدەم» دەپ، وتانىن شەكسىز سۇيگەن ابىز ءابىشتىڭ ەسىمىن ەل جادىندا ساقتاۋ - بارشامىزدىڭ ورتاق پارىزىمىز، - دەلىنگەن مەملەكەت باسشىسىنىڭ قۇتتىقتاۋ حاتىندا.
ءماجىلىس سپيكەرى ءوز سوزىندە ءابىش كەكىلباي ۇلىنىڭ 85 جىلدىق مەرەيتويى شىن مانىندە حالىقتىڭ مەرەكەسى، ۇلتتىڭ تويى ەكەنىن اتاپ ءوتىپ، الاش ابىزىنىڭ ادامي بولمىسىن، قايراتكەرلىك قىرلارىن ەسكە الدى.
«ءابىش كەكىلباي ۇلى وقۋلارى-2024» اتتى حالىقارالىق عىلىمي-تاجىريبەلىك كونفەرەنسياعا تۇركيا، ماجارستان، وزبەكستان، قىرعىزستان، ازەربايجان جانە وتاندىق عالىمدار قاتىستى.
سونىمەن قاتار مەرەيتويعا ارنالعان «ءابىش الەمى» حالىقارالىق تەاتر فەستيۆالى ءوتتى.