ءابيبا ءابۋجاقىنوۆا وليمپيادالىق رەيتينگىدە العاشقى ۇشتىككە ەندى
استانا. KAZINFORM - دزيۋدودان قازاقستان ايەلدەر كومانداسىنىڭ ۇزدىگى ءابيبا ءابۋجاقىنوۆا وليمپيادالىق جانە الەمدىك رەيتينگىدەگى جاعدايىن جاقسارتتى.
ۇلتتىق وليمپيادا كوميتەتىنىڭ حابارلاۋىنشا، 48 كەلى سالماقتا سىنعا تۇسەتىن ءابيبا وليمپيادالىق رەيتينگىدە 4576 ۇپايمەن ءۇشىنشى ورىنعا كوتەرىلگەن.
ءبىرىنشى ورىنعا 5945 ۇپاي جيناعان اسسۋنتا سكۋتتو (يتاليا)، ەكىنشى ورىنعا 5200 ۇپايمەن ناتسۋمي تسۋنودا جايعاسقان.
الەمدىك رەيتينگىدە وتانداسىمىز 5184 ۇپايمەن ءتورتىنشى ورىنعا تۇراقتادى.
ايتا كەتەلىك، ءابيبا ءابۋجاقىنوۆا بيىل ءوزى قاتىسقان رەسمي تۋرنيرلەردىڭ بارىندە ۇزدىك ۇشتىككە ەندى.
پورتۋگاليادا وتكەن گران-پري تۋرنيرىندە، باكۋ مەن انتالياداعى Grand Slam تۋرنيرىندە قولا جۇلدەگەر اتانسا، تاشكەنتتەگى Grand Slam دا كۇمىسكە قول جەتكىزدى.
ءابيبا - دزيۋدودان قازاق قىزدارى اراسىندا الەم چەمپيوناتى مەن Grand Slam تۋرنيرلەرىنەن جۇلدە العان العاشقى سپورتشى. سونداي-اق ونىڭ ازيا چەمپيوناتى مەن ازيا ويىندارىنىڭ كۇمىس جۇلدەگەرى اتانعانىن ايتا كەتەيىك.
سپورتشىنىڭ باپكەرى - نۇربول سۇلەيمەنوۆ.