ءابيبا ءابۋجاقىنوۆا دزيۋدودان قازاقستاننىڭ ەڭبەك سىڭىرگەن سپورت شەبەرى اتاعىن الدى

اتىراۋ. KAZINFORM - پاريج وليمپياداسىنا قاتىسىپ، 5-ورىن العان ءابيبا ءابۋجاقىنوۆا دزيۋدودان قازاقستان رەسپۋبليكاسىنا ەڭبەك سىڭىرگەن سپورت شەبەرى اتاعىندى.

بۇل تۋرالى دزيۋدوشى ءوزىنىڭ الەۋمەتتىك جەلىدەگى پاراقشاسىندا حابارلادى.

«دزيۋدودان قازاقستان رەسپۋبليكاسىنا ەڭبەك سىڭىرگەن سپورت شەبەرى اتاعىنا يە بولدىم. اقتوبەدە ءوتىپ جاتقان دزيۋدودان قازاقستان چەمپيوناتى اياسىندا قازاقستان رەسپۋبليكاسى تۋريزم جانە سپورت ءمينيسترى ەربول قۋانتاي ۇلى مىرزابوسىنوۆ كۋالىك تابىستادى. سونداي- اق، ەلدوس اعام التىن ناشيۆكاسىنا قول جەتكىزدى. ەلدوس اعامنىڭ جولىن بەرسىن دەپ ىرىمدادىم»، - دەيدى ءابيبا ءابۋجاقىنوۆا.

دزيۋدوشى ءابيبا ءابۋجاقىنوۆانىڭ ەنشىسىندە الەم چەمپيوناتىنىڭ ەكى كۇمىس جۇلدەسى بار. ول 48 كەلى سالماقتا كۇرەسەدى. اتىراۋ وبلىسىنىڭ اتىنان پاريج وليمپياداسىنا قاتىسقان ول قولا جۇلدە ءۇشىن بەلدەسۋدە شۆەد پالۋانىنان ۇتىلىپ قالدى. دەگەنمەن، ءتورتجىلدىق دودادا 5-ورىنعا تۇراقتادى.

«مەنىڭ سىنۋعا، جەڭىلۋگە، نالۋعا جانە كۇرەسپەۋگە قۇقىعىم جوق دەپ ويلايمىن! مەن ءالى- اق جارق ەتەمىن»، - دەگەن ەدى وليمپيادان كەيىن ءابيبا ءابۋجاقىنوۆا.

ەسكە سالا كەتەلىك، بۇعان دەيىن اتىراۋلىقتار پاريج وليمپياداسىنان ورالعان ءابيبا مەن ەسميگۇلگە كولىك سىيلاعانىن حابارلاعان بولاتىنبىز.

كەيىن دزيۋدوشى ءابيبا ءابۋجاقىنوۆاعا ءۇشىنشى كولىك سىيعا بەرىلگەنىن جازعان ەدىك.