ءابيبا ءابۋجاقىنوۆا: باستى ماقساتىم - وليمپيادانىڭ فينالىنا جەتىپ، التىنعا تالاسۋ

استانا. KAZINFORM - پاريجدە وتەتىن XXXIII جازعى وليمپيادا ويىندارىنا دزيۋدودان قازاقستان ۇلتتىق قۇراما كومانداسىنان 8 دزيۋدوشى قاتىسادى. بۇگىن ولار پاريجگە اتتانادى.

اتالعان دودادا قازاق جانكۇيەرلەرى دزيۋدودان ەرلەر اراسىندا ەلدوس سمەتوۆقا ءۇمىت ارتسا، ايەلدەر اراسىندا ءابيبا ءابۋجاقىنوۆادان مەدال كۇتىپ وتىرعانى انىق. ءابۋجاقىنوۆا وليمپياداعا اتتانىپ بارا جاتىپ، Kazinform تىلشىسىنە ەكسكليۋزيۆ سۇحبات بەرىپ، وليمپيادا الدىنداعى باستى ماقساتىن ايتىپ بەردى.

«ءار سپورتشىنىڭ ارمانى - وليمپيادا التىنى. مەنىڭ دە ارمانىم سول التىنعا قول جەتكىزۋ. فينالعا دەيىن سۇرىنبەي جەتىپ، التىنعا تالاسسام دەگەن ماقساتپەن پاريجگە اتتانىپ بارا جاتىرمىن»، - دەدى سپورتشى.

سونىمەن قاتار وليمپيادا الدىنداعى وقۋ-جاتتىعۋ جيىندارى وتە جوعارى دەڭگەيدە وتكەنىن، وليمپياداعا 100 پايىز دايىن ەكەنىن دە جاسىرمادى.

«وليمپيادا الدىنداعى وقۋ-جاتتىعۋ جيىندارى ءوزىمنىڭ ويلاعانىمىداي ءوتتى. وليمپياداعا 100 پايىز دايىنمىن. وسىعان دەيىنگى قاتىسقان الەمدىك دودالاردا جۇلدەسىز قايتقان جوقپىن. بۇل جولى دا جۇلدەگە قول جەتكىزۋ باستى ماقساتىم. مەن 27-شىلدە كۇنى ايەلدەر اراسىندا ءبىرىنشى بولىپ، جارىسقا شىعامىن. ماعان جانكۇيەر بولىڭىزدار»، - دەدى ءابيبا ءابۋجاقىنوۆا.

ەستەرىڭىزگە سالا كەتەيىك، دزيۋدودان ايەلدەر اراسىندا ءابيبا ابۋجاقىنوۆا (48 كەلى)، كاميلا بەرلىقاش (78 كەلى)، ەسميگۇل كۋيۋلوۆا ەل نامىسىن قورعايدى.

ايتا كەتەيىك، قازاقستان قۇراماسى وليمپيادا ويىندارىنا سپورتتىڭ 25 تۇرىنەن 92 جولداما جەڭىپ الدى.

فرانسيا استاناسى پاريج قالاسىندا وتەتىن XXXIII جازعى وليمپيادا ويىندارى 26-شىلدە مەن 11-تامىز ارالىعىنا بەلگىلەنگەن.

ويىنعا الەمنىڭ 205 ەلىنەن 10500 سپورتشى قاتىسادى.

وندا 32 سپورت تۇرىنەن 329 مەدال جيىنتىعى ساراپقا سالىنادى.

اۆتوركۇنسۇلتان وتارباي