بۇزاقىلار كۇيشى دينا ەسكەرتكىشىنىڭ دەرەكتەر تاقتاسىن تەۋىپ قيراتقان

استانا. KAZINFORM - استانا قالاسى قوعامدىق كەڭەسىنىڭ مۇشەسى تولەگەن قۋانىشيەۆ اكىمدىكتەن كۇيشى دينا ەسكەرتكىشىنىڭ ماڭايىنا بەينەكامەرا ورناتۋدى سۇرادى.

«كۇيشى دينا ەسكەرتكىشىندە QR- كود تاقتاسى ورناتىلعان بولاتىن. سونىڭ اياقپەن تەۋىپ قيراتىپ كەتكەن. كامەرانىڭ ءوزىن بولماسا دا، مۋلياجىن قويسا بولار ەدى. ادامدار كامەرا بار ەكەنىن كورسە، باقىلاۋ بار ەكەنىن ءبىلىپ، اياعىن تارتۋشى ما ەدى؟ .. » - دەدى ول قوعامدىق كەڭەستىڭ وتىرىسىندا.

استانا قالاسى اكىمىنىڭ ورىنباسارى ەۆگەني گلوتوۆ قالانىڭ كامەرامەن جابدىقتاۋ ماسەلەسى جوسپاردا بار ەكەنىن ايتتى.

«بىلتىر 1200 كامەرا ورناتتىق. تاعى دا كونكۋرس پروتسەدۋرالارى ءجۇرىپ جاتىر. بيىل تاعى مىڭنان استام كامەرا قويامىز. سيفرلاندىرۋ باسقارماسىنا وسى جەردە تاپسىرما بەرەمىن. ارىپتەستەرىمىز ايتىپ وتىرعان اۋداندا مىندەتتى تۇردە تۇراقتى بەينەباقىلاۋ ۇيىمداستىرىلسىن. ول كامەرالار پوليتسيا دەپارتامەنتىنىڭ جەدەل باسقارۋ ورتالىعىنا جالعانۋى كەرەك. جەكەلەگەن پاراساتسىز ازاماتتاردىڭ تاراپىنان زاقىم كەلەتىن نىساندارعا 24 ساعاتتىق بەينەباقىلاۋ ورناتىلسىن. بۇل ماسەلەنى جىل اياعىنا دەيىن تىندىرۋ كەرەك»، - دەدى قالا اكىمىنىڭ ورىنباسارى.

اۆتور

ەسىمجان ناقتىباي