بۇل كاسىپورىندارعا قىزمەت اياسىن كەڭەيتكەن كەزدە مەملەكەتتىك كومەكتەن ايىرىلىپ قالماۋعا مۇمكىندىك بەرەدى.
مۇنداي ۇسىنىستى «اتامەكەن» ۇلتتىق كاسىپكەرلەر پالاتاسى باسقارما ءتوراعاسىنىڭ ورىنباسارى اسلان قاليعازين ايتتى. ول قۇرىلتايدىڭ ەكونوميكالىق ساياسات، ونەركاسىپ جانە ەنەرگەتيكا كوميتەتىنىڭ كەڭەيتىلگەن وتىرىسىندا شاعىن جانە ورتا بيزنەستى دامىتۋ ماسەلەلەرىنە توقتالدى. جيىندا پرەزيدەنت قاسىم-جومارت توقايەۆتىڭ 2026-جىلعى 28-قازانداعى جولداۋىندا بەرىلگەن تاپسىرمالاردىڭ ورىندالۋ بارىسى تالقىلانىپ جاتىر.
اسلان قاليعازيننىڭ ايتۋىنشا، كاسىپكەرلىكتى دامىتۋدىڭ كەلەسى ماڭىزدى كەزەڭى - شاعىن كاسىپورىنداردىڭ ورتا بيزنەس دەڭگەيىنە كوتەرىلۋىنە جاعداي جاساۋ. ويتكەنى ورتا كاسىپورىندار جاڭا جابدىقتار ساتىپ الۋعا قارجى قۇيىپ، بىلىكتى ماماندارعا جۇمىس ورىندارىن اشا الادى. سونداي-اق ولار شاعىن جەتكىزۋشىلەر مەن ءىرى ءوندىرىس ورىندارىنىڭ اراسىنداعى بايلانىستى نىعايتادى.
- مۇنى ينۆەستيتسيا كولەمىنەن دە كورۋگە بولادى. سوڭعى بەس جىلدا ورتا كاسىپورىنداردىڭ نەگىزگى كاپيتالعا سالعان ينۆەستيتسياسى نومينالدى ماندە 2,6 ەسە ءوستى. 2021-جىلى بۇل كورسەتكىش 1,13 تريلليون تەڭگە بولسا، 2025-جىلى 2,95 تريلليون تەڭگەگە جەتتى. وسى كەزەڭدە ورتا بيزنەستىڭ ەلدەگى جالپى ينۆەستيتسياداعى ۇلەسى 8,5 پايىزدان 12,6 پايىزعا دەيىن ارتتى. دەمەك، سانى از بولعانىنا قاراماستان، ورتا كاسىپورىندار ءوندىرىستى دامىتۋعا كوبىرەك قارجى ءبولىپ وتىر، - دەدى اسلان قاليعازين.
دەگەنمەن شاعىن كاسىپورىنداردىڭ ورتا بيزنەسكە وتۋىنە ءبىرقاتار كەدەرگى بار. ولاردىڭ قاتارىندا سالىق تالاپتارى، ينۆەستيتسيالىق قارجىنىڭ تاپشىلىعى جانە مەملەكەتتىك قولداۋدىڭ كەيبىر تۇرلەرىنەن ايىرىلۋ قاۋپى تۇر.
ماسەلەن، كاسىپورىننىڭ تابىسى ارتقانىمەن، ءوندىرىس كولەمى بۇرىنعى دەڭگەيىندە قالۋى مۇمكىن. سەبەبى ءتۇسىمنىڭ كوبەيۋىنە شيكىزات پەن دايىن ءونىم باعاسىنىڭ قىمباتتاۋى دا اسەر ەتەدى. سوعان قاراماستان، مۇنداي كاسىپورىن ورتا بيزنەس ساناتىنا ءوتىپ، ميكرو جانە شاعىن بيزنەسكە ارنالعان مەملەكەتتىك جەڭىلدىكتەردەن ايىرىلىپ قالۋى ىقتيمال.
وسى ماسەلەنى شەشۋ ءۇشىن «اتامەكەن» كاسىپورىندارعا ءبىر ساناتتان ەكىنشىسىنە ءوتۋ كەزەڭىندە ارنايى قولداۋ كورسەتۋدى ۇسىنىپ وتىر.
- شاعىن بيزنەستەن ورتا بيزنەسكە وتۋگە ارنالعان قولداۋ شارالارىنىڭ ارنايى توپتاماسىن ازىرلەۋدى ۇسىنامىز. ونىڭ اياسىندا سالىقتىق اكىمشىلەندىرۋ تالاپتارىنا بەيىمدەلۋگە جاعداي جاساۋ، بۇرىن ماقۇلدانعان مەملەكەتتىك كومەكتى كەلىسىلگەن مەرزىمگە دەيىن ساقتاۋ، ينۆەستيتسيالىق نەسيە بەرۋ جانە ءوندىرىستى جاڭعىرتۋعا قولداۋ كورسەتۋ كوزدەلۋى كەرەك، - دەدى ول.
سونىمەن قاتار ۇلتتىق كاسىپكەرلەر پالاتاسى شاعىن جەتكىزۋشىلەر مەن ءىرى تاپسىرىس بەرۋشىلەردىڭ اراسىنداعى زاڭدى ساۋدا قاتىناستارىنا كەدەرگى كەلتىرەتىن سالىق تالاپتارىن قايتا قاراۋ قاجەت دەپ ەسەپتەيدى.
- ءبىز سالىق ەسەپتەۋدىڭ جەڭىلدەتىلگەن ءتارتىبىن ەنگىزۋدى ۇسىنامىز. ياعني كاسىپورىننىڭ بارلىق تابىسىنان شىعىندارىن الىپ تاستاپ، قالعان سوماعا عانا سالىق سالۋ قاجەت. بۇل كاسىپكەرلەردى كۇردەلى سالىق ەسەبىن جۇرگىزۋدەن بوساتادى. سونىمەن قاتار ءارتۇرلى سالىق رەجيمىمەن جۇمىس ىستەيتىن كاسىپورىنداردىڭ ءبىر-بىرىمەن ساۋدا جاساۋىنا كەدەرگى كەلتىرەتىن شەكتەۋلەردى الىپ تاستاۋدى ۇسىنامىز. وڭايلاتىلعان دەكلاراتسيا بويىنشا جۇمىس ىستەيتىن كاسىپورىنداردىڭ باسقا كاسىپورىندارمەن جاسايتىن مامىلەلەرىنە 8 پايىزدىق سالىق مولشەرلەمەسىن بەلگىلەپ، شەكتى كورسەتكىشتى 300 مىڭ ايلىق ەسەپتىك كورسەتكىشكە دەيىن تومەندەتۋ قاجەت. مەملەكەت كاسىپورىنداردىڭ وسۋىنە جاعداي جاساۋى كەرەك، ولاردى شاعىن بيزنەس دەڭگەيىندە قالۋعا ماجبۇرلەمەۋى ءتيىس، - دەدى اسلان قاليعازين.
ايتا كەتەيىك، بۇعان دەيىن مەملەكەت باسشىسى شاعىن بيزنەستى ءۇش جىل تەكسەرمەيتىنىن ايتقان ەدى.