بيزنەستى جەڭىلدىكپەن قارجىلاندىرۋعا قانشا ميلليارد تەڭگە بولىنەدى

استانا. KAZINFORM - بيىل بيزنەستى جەڭىلدىكپەن قارجىلاندىرۋعا 275 ميلليارد تەڭگە بولىنەدى. بۇل تۋرالى ۇلتتىق ەكونوميكا مينيسترلىگى كاسىپكەرلىكتى مەملەكەتتىك قولداۋ جانە قورعاۋ دەپارتامەنتىنىڭ ديرەكتورى دارىن ءابدۋالى ايتتى.

- بۇگىنگى تاڭدا بيزنەستى مەملەكەتتىك قولداۋدىڭ تالاپ ەتىلەتىن شارالارىنىڭ ءبىرى كاسىپكەرلىكتى قولداۋدىڭ كەشەندى باعدارلاماسى اياسىندا ىسكە اسىرىلاتىن بيزنەستىڭ جول كارتاسى جانە قاراپايىم زاتتار ەكونوميكاسى باعدارلامالارىنىڭ قۇرالدارى بولىپ قالا بەرەدى. بۇل باعدارلامانىڭ وپەراتورى - «دامۋ» قورى. ماسەلەن، 2024-جىلدىڭ قورىتىندىسى بويىنشا كرەديتتەردى سۋبسيديالاۋ ارقىلى جەڭىلدەتىلگەن قارجىلاندىرۋ شارالارىمەن شامامەن 1 تريلليون تەڭگە كرەديت سوماسىنا 17 مىڭنان استام بيزنەس جوباسى قامتىلدى. 310 ميلليارد تەڭگە سوماسىنا 8 مىڭ جوبا بويىنشا كەپىلدىك بەرىلدى. بيىل وسى ماقساتتارعا 275,2 ميلليارد تەڭگە باعىتتاۋ جوسپارلانعان، - دەدى دەپارتامەنت باسشىسى ورتالىق كوممۋنيكاتسيالار قىزمەتىندەگى بريفينگتە.

ونىڭ دەرەگىنشە، وڭىرلەر بولىنىسىندە جوبالاردىڭ باسىم بولىگى الماتى، استانا، شىمكەنت قالالارىندا، الماتى، تۇركىستان جانە اقتوبە وبلىستارىندا ىسكە اسىرىلدى.

- سالالار بويىنشا وڭدەۋ ونەركاسىبى، كولىك جانە قويمالاۋ، ءبىلىم بەرۋ جوبالارى باسىم، - دەدى دارحان ءابدۋالى.

ايتا كەتەيىك، قازىرگى ۋاقىتتا شوب سۋبەكتىلەرىن جەڭىلدىكپەن قارجىلاندىرۋدىڭ جاڭا باعدارلاماسى ازىرلەنىپ جاتىر.