بيزنەسمەن اندرەي لاۆرەنتيەۆ تۋرالى نە بىلەمىز

  بۇگىن ونەركاسىپ جانە قۇرىلىس ءمينيسترى قانات شارلاپايەۆ ارنايى باسپا ءسوز ءماسليحاتىن ءوتىزىپ، «ارسەلورميتتال تەمىرتاۋ» ا ق- نى مەملەكەت مەنشىگىنە قايتارۋ كەلىسسوزدەرى اياقتالعانىن، جاڭا ينۆەستور-وتاندىق بيزنەسمەن اندرەي لاۆرەنتيەۆ بولعانىن ءمالىم ەتكەن ەدى.

وسىعان قاراي ەلىمىزدەگى ەڭ ءىرى ءوندىرىس وشاعىن يەلىگىنە العان كاسىپكەردىڭ ءومىر جولىنا كوز جۇگىرتكەن ەدىك، دەپ حابارلايدى Kazinform.

1979-جىلدىڭ 29-ماۋسىمىندا الماتى قالاسىندا دۇنيەگە كەلگەن اندرەي لاۆرەنتيەۆ ۇيلەنگەن، 6 بالاسى بار. جوعارى قۇقىق مەكتەبىن «قۇقىقتانۋ» ماماندىعى بويىنشا بىتىرگەن. ول «الليۋر» كومپانيالار توبى» ا ق ديرەكتورلار كەڭەسىنىڭ ءتوراعاسى جانە اكتسيونەرى. ونىڭ قۇرامىنا «اگروماشحولدينگ» ج ش س جانە «سارىارقااۆتوپروم» جشس كىرەدى. توپ قازاقستان اۋماعىنداعى Chevrolet, Kia, JAC جانە LADA اۆتوبرەندتەرىنىڭ رەسمي ءوندىرۋشىسى، ديستريبيۋتەرى جانە سەرىكتەسى سانالادى. استانا جانە الماتىدا سەگىز جەكە ديلەرلىك ورتالىعى بار. «اگروماشحولدينگ KZ» ا ق- نىڭ 65 پايىزىنا يەلىك ەتەدى. ارمانجان بايتاسوۆپەن بىرگە «بيزنەس- FM» راديوستانساسىن قۇرعان. قوستاناي وبلىسىنداعى ترياتلون فەدەراتسياسىنىڭ پرەزيدەنتى، «انا ءۇيى» جوباسىنىڭ، YPO Kazakhstan, IQanat ءبىلىم بەرۋ جوباسىنىڭ قاتىسۋشىسى.

اندرەي لاۆرەنتيەۆ 2012 -جىلى ەلىمىزدە CKD قۇراستىرۋ ادىسىمەن اۆتوموبيل شىعاراتىن ءوندىرىستىڭ نەگىزىن قالادى. ءبىر جىلدان كەيىن ءدال وسى ءوندىرىس وشاعى «يندۋستريالاندىرۋ كوشباسشىسى» ساناتىندا قازاقستان پرەزيدەنتىنىڭ «التىن ساپا» ارناۋلى سىيلىعىنا يە بولدى. ال 2017-جىلى ول «اگروماشحولدينگ KZ» ا ق اكسيونەرىنە اينالدى. كاسىپورىن بەلارۋستىڭ «گومسەلماش» كومپانياسى شىعاراتىن اۋىل شارۋاشىلىعى تەحنيكالارىن قازاقستان اۋماعىندا ديستريبيۋتسيالاۋعا بىرەگەي قۇقىق الدى. 2020-جىلى «ۋزاۆتوسانوات» ا ق- پەن بىرگە قازاقستاندا امەريكالىق Chevrolet برەندتى اۆتوموبيل ءوندىرىسىنىڭ اكتسيونەرىنە اينالدى. سول جىلى «الليۋر» كومپانيالار توبى» ا ق استانادا ءبىرىنشى وتاندىق ەلەكتروموبيلدەردىڭ ۇلتتىق پاۆيلونىن اشىپ، قازاقستاندا «جاسىل تەحنولوگيالاردى» دامىتۋعا بەت بۇرادى. 2021-جىلى Kia Corporation كومپانياسىمەن بىرگە ەلىمىزدە Kia برەندتى اۆتوموبيل قۇراستىراتىن ءوندىرىس وشاعىنىڭ اكسيونەرى بولدى.

ايتا كەتەيىك، ونەركاسىپ جانە قۇرىلىس ءمينيسترى قانات شارلاپايەۆ قازاقستان ۇكىمەتى مەن «ارسەلورميتتال» اراسىنداعى كەلىسىمدى مەگا-مامىلە دەپ اتاۋعا بولاتىندىعىن ايتقان ەدى.

«قازاقستان ۇكىمەتى مەن «ارسەلورميتتال» اراسىنداعى كەلىسىمدى مەگا- مامىلە دەپ اتاۋعا بولادى. ونىڭ ەلىمىز ءۇشىن ماڭىزى ەرەكشە. «ارسەلورميتتال تەمىرتاۋ» جانە اقتاۋ قۇبىر زاۋىتىنىڭ قۇنىن 3,5 ميلليارد دوللاردان 286 ميلليون دوللارعا دەيىن تومەندەتتىك. مامىلەنى جۇزەگە اسىرۋعا مەملەكەتتىك بيۋدجەتتەن ءبىر دە ءبىر تەڭگە جۇمسالعان جوق. جاڭا ينۆەستور ArcelorMittal باس كومپانياسىنىڭ قىسقا مەرزىمدى جانە ۇزاق مەرزىمدى مىندەتتەمەلەرى بويىنشا جاۋاپكەرشىلىكتى موينىنا الدى. 286 ميلليون دوللار-بۇل تولىق جۇمىس ىستەپ تۇرعان ەكى كاسىپورىننىڭ قۇنى»، - دەگەن ەدى مينيستر.